Իրանի արտգործնախարար Ջավադ Զարիֆը Թեհրանում ընդունել է Ադրբեջանի իր գործընկեր էլմար Մամեդյարովին: Այս մասին ասվում է Իրանի ԱԳՆ տարածած հաղորդագրության մեջ:
Հանդիպման ընթացքում կողմերը քննարկել են երկու հարևան երկրների տնտեսական համագործակցության զարգացման հեռանկարները: Բացի այդ, կողմերը մտքեր են փոխանակել տարածաշրջանային և միջազգային կարևոր հարցերի շուրջ:
Նույն հանդիպման մասին Ադրբեջանի ԱԳՆ տարածած հաղորդագրության մեջ նշվում է, որ Մամեդյարովն ընդգծել է տարածաշրջանում անվտանգության և խաղաղության ապահովման անհրաժեշտւթյունը, մասնավորապես նա կարևորել է հայ-ադրբեջանական հակամարտության կարգավորման խնդիրը և իրանական կողմին տեղեկացրել է բանակցությունների ընթացքի մասին:
Զարիֆն իր հերթին նշել է, որ «Ադրբեջանի անվտանգությունն ու զարգացումը նշանակում է Իրանի անտանգություն և զարգացում»: Ըստ Ադրբեջանի ԱԳՆ հաղորդագրության, Զարիֆն ասել է, որ «Իրանը կողմ է Լեռնային Ղարաբաղի շուրջ հայ-ադրբեջանական հակամարտության խաղաղ կարգավորմանը՝ հիմնված Ադրբեջանի տարածքային ամբողջականության և սահմանների անձեռնմխելիության վրա»:
Պատրաստեց՝ Վիկտորյա ԱՆԴՐԵԱՍՅԱՆԸ