Երեւանի թատրոնի եւ կինոյի ինստիտուտի պրոֆեսոր, կինոգետ Դավիթ Մուրադյանն Aravot.am-ին հայտնեց, որ օրերս է վերադարձել Արցախից: Արցախի պետական եւ Շուշիի տեխնոլոգիական համալսարաններում նա դասախոսություններ է կարդացել:
«Իրենք ոչ ֆորմալ կրթության ծրագիր ունեն, եւ ինձ երկրորդ անգամ էին հրավիրում: Մի ակտիվ հասարակական գործիչ կա` Կարեն Օհանջանյան: Նա էր կազմակերպել եւ իրականացնում էր: Նա պարբերաբար Հայաստանից տարբեր մասնագիտությունների տիրապետող դասախոսների է հրավիրում` տնտեսագիտությունից մինչեւ մարդաբանություն, արվեստ:
Երկու տարի առաջ եղել էի դասախոսությունների, այս անգամ կենսաբանական գիտությունների դոկտոր, պրոֆեսոր Լեւոն Եպիսկոպոսյանի հետ էինք: Նա բավականին հետաքրքիր դասախոսություն էր կարդում` «Իմ նեանդերթալյան մեծ տատիկը» վերնագրով` անտրոպոլոգիայի թեմայով…Անձամբ ես մեծ հետաքրքրությամբ լսում էի դասախոսությունը:
Նաեւ ինքս հանդես եկա դասախոսությամբ` «Մշակույթը որպես կեցության տուն» վերնագրով: Դա ընդհանուր մշակութաբանական դասախոսություն էր` Ստեփանակերտի համալսարանի համար, իսկ Շուշիի տեխնոլոգիական համալսարանում այլ թեմա էր անհրաժեշտ:
Ի վերջո եկավ մի պահ, երբ լուսանկարչության գյուտից սկսած, կինոյով, հետո հեռուստատեսությամբ արվեստները եւ տեխնիկան «ամուսնացան»: Դա բավականին երջանիկ ամուսնություն էր հատկապես կինոյի համար: Դասախոսությունը Շուշիի համար կենտրոնացած էր հենց այդ գործընթացների վրա»,-հայտնեց պարոն Մուրադյանը:
Նա ասաց, որ դասախոսություններին հաջորդել է հարցուպատասխանը, որը բավականին ակտիվ է եղել. «Հրաշալի երեխաներ կան Արցախում, մեծ կենտրոնացությամբ լսում էին, հարցեր տալիս: Դա կարեւոր էր ոչ միայն իրենց, այլեւ մեզ համար: Այնտեղի երիտասարդները անկախության սերունդն են, որոնք աչք են բացել, իրենց հայրենիք Արցախը տեսել են որպես պետություն: Կարեւոր էին նաեւ Արցախի մտավորականների հետ մեր հանդիպումները»:
Գոհար ՀԱԿՈԲՅԱՆ
Լուսանկարները Արցախի պետական համալսարանի կայքից:
