«Դատարանը քաղաքական հարցերի քննարկման համար պատշաճ վայր չէ: Մի վերածեք այս դատավարությունը քաղաքական հարցերի քննարկման»,- սահմանադրական կարգի ենթադրյալ տապալման գործով (Աննա Դանիբեկյան) դատական նիստին հայտարարեց Աննա Դանիբեկյանը:
Ինչպես արդեն տեղեկացրել ենք, դատական նիստի մեկնարկից առաջ գործով ամբաստանյալ Արմեն Գևորգյանի պաշտպան Էրիկ Ալեքսանյանը նախագահող դատավորին ինքնաբացարկի միջնորդություն էր ներկայացրել:
Արմեն Գեւորգյան
Այս առիթով Արմեն Գևորգյանը ցանկացավ հայտարարությամբ հանդես գալ: Նախագահող դատավորը նշեց՝ դիրքորոշումը պետք է ներկայացվի բացառապես բացարկի միջնորդության շրջանակում: Արմեն Գևորգյանը մասնավորապես հայտարարեց. «Նախաքննության և դատավարության ողջ ընթացքում մնացել եմ դատաիրավական հարթության մեջ՝ փորձելով այդ հարթությունում հասնել արդարության: Դժվարությամբ էի զսպում ինձ բարձրաձայնելու այն կասկածը, որը ինձ հանգիստ չէր տալիս: Այսօր պետք է բարձրաձայնեմ: Այս ողջ դատավարության գործընթացը եղել է մի հրեշավոր ծրագրի կարևոր օղակներից մեկը, որը բաժանել էր մեր հասարակությանը սևի ու սպիտակի՝ վարկաբեկելով մեր հաղթական հերոսներին և զինվորներին»:
Նախագահող դատավորը սահմանափակեց նրա ելույթը՝ նշելով, որ հայտարարությունը պարունակում է միջնորդությանը չվերաբերող հանգամանքներ: Աննա Դանիբեկյանը հայտնեց՝ ցանկության դեպքում կարող է հայտնել իր դիրքորոշումը:
Կարդացեք նաև
Արմեն Գևորգյանն արձագանքեց՝ այս դատարանն այսուհետ իր համար համարվում է ապօրինի, անօրինական, և ինքը հրաժարվում է դատավորի հետ որևէ ձևով առնչվել:
Տաթև ՀԱՐՈՒԹՅՈՒՆՅԱՆ
