«Երևանի ընդհանուր իրավասության դատարանը թույլ է տվել Ռոբերտ Քոչարյանին փետրվարի 3-ից փետրվարի 8-ն ընկած ժամանակահատվածում մեկնել Հայաստանից դուրս»,- սահմանադրական կարգի ենթադրյալ տապալման գործով (Աննա Դանիբեկյան) դատական նիստի մեկնարկին հայտարարեց գործով մեղադրող դատախազ Գևորգ Բաղդասարյանը: Նա նշեց, որ այդ որոշման հիման վրա դատարանը խնդրել է Ռոբերտ Քոչարյանի նկատմամբ կիրառված սահմանափակումները ժամանակավորապես նշված միջակայքում վերացնել, հետո կրկին կիրառել:
Գեւորգ Բաղդասարյան
Դատախազը հիշեցրեց՝ նախորդ նիստերից մեկում ևս այդ հարցը բարձրացրել են, բայց պատասխան չեն ստացել: Ուստի հիմա ևս ցանկանում է ստանալ այն հարցի պատասխանը, թե Ռոբերտ Քոչարյանին ինչի հիման վրա է թույլատրվում մեկնել ՀՀ-ից, ինչով է որոշվում նրա մեկնելու և վերադառնալու ժամանակահատվածը:
Աննա Դանիբեկյան
Նախագահող դատավոր Աննա Դանիբեկյանը նշեց. «Դատավարության յուրաքանչյուր մասնակից իրավունք ունի ծանոթանալ գործի նյութերին և ստանալ տեղեկություն, այդ թվում Ձեր բարձրացված հարցի վերաբերյալ: Բայց Դուք չեք դիմել այդ տեղեկությունը ստանալու համար: Եթե գտնում եք, որ դատարանի որոշումը ենթակա է բողոքարկման, դրա իրավունքը ևս ունեք»:
Դատախազը արձագանքեց՝ խնդրում եմ տրամադրել դատարանում առկա այն փաստաթղթերը, որոնց հիման վրա դատարանը որոշել է թույլատրել Ռոբերտ Քոչարյանին լքել Հայաստանը: Դատավորն ասաց, որ այդ նյութերը կտրամադրվեն, իսկ պահին դատարանն անցնում է իր ինքնաբացարկի միջնորդության քննարկմանը:
Կարդացեք նաև
Նշենք, որ գործով ամբաստանյալ Արմեն Գևորգյանի պաշտպան Էրիկ Ալեքսանյանը նախագահող դատավոր Աննա Դանիբեկյանին ինքնաբացարկի միջնորդություն է ներկայացրել: Դատարանն այս պահին քննում է այդ միջնորդությունը:
Տաթև ՀԱՐՈՒԹՅՈՒՆՅԱՆ
