«Պարզաբանումներ արդեն տրվել են։ Ավելացնելու բան չկա»,-ԱԺ-կառավարություն հարցուպատասխանի ժամանակ այսօր հայտարարեց ՀՀ փոխվարչապետ Տիգրան Ավինյանը՝ անդրադառնալով «Լուսավոր Հայաստան» խմբակցության պատգամավոր Արկադի Խաչատրյանի դիտարկմանն այն մասին, որ «Իսկանդերի» առնչությամբ ՀՀ վարչապետը թույլ տվեց մի հայտարարություն, հետո ասվեց, թե նրան ճիշտ չեն զեկուցել։ Արկադի Խաչատրյանը նաեւ հետաքրքրվել է՝ ռուսական կողմը հերքել է այդ զինատեսակի կիրառումն Արցախում, ի վերջո այն կիրառվե՞լ է։
Հատկանշական է, որ Արկադի Խաչատրյանը հարցն ուղղում էր ՀՀ վարչապետ Նիկոլ Փաշինյանին, սակայն ամբիոնին մոտեցավ Տիգրան Ավինյանը։ Նա նշեց․ «Կառաջարկեմ ռուսական կողմի վերջին հայտարարության հետ ծանոթանալ, որում վերջինս հայտնում է, որ հարցը պարզաբանված է եւ որեւէ խնդիր չկա»։
Արկադի Խաչատրյանը նկատեց՝ «Իսկանդերը» ռուսական ռազմարդյունաբերության վարկանիշի հիմնասյուներից է, եւ երբ ՀՀ վարչապետն ասում է, որ այն պայթել է 10%-ով, դա չէր կարող Մոսկվայում վրդովմունք չառաջացնել։ Տիգրան Ավինյանը նույն պատասխանը տվեց․ «Ռուսական կողմի հայտարարությամբ՝ հարցը պարզաբանված է»։
Կարդացեք նաև
Լուիզա ՍՈՒՔԻԱՍՅԱՆ
