«Լեւոն Տեր-Պետրոսյանն իր ընդդիմադիր քաղաքական գործունեության ընթացքում 2 անգամ փորձել է անել պատկերավոր ասած իշխանափոխություն եւ հեղափոխություն։ Մեկը չի ստացվել ձեզ կամ մեզ անհայտ պատճառներով, իսկ երկրորդի ճակատագիրը բոլորս գիտենք։ Թերեւս նա որոշել է կրկին փորձել եւ այս անգամ անել ավազակապետական հեղափոխություն»,-ԱԺ-կառավարություն հարցուպատասխանի ժամանակ այսօր անդրադառնալով երեք նախագահների ուժերի միավորման վերաբերյալ առաջին նախագահ Լեւոն Տեր-Պետրոսյանի այսօրվա բացահայտմանը՝ ասաց վարչապետի պաշտոնակատար Նիկոլ Փաշինյանը։
Նա նշեց․ «Մի երկու տերմին էլ կա, որ կարգավիճակիս բերումով հիմա չեմ օգտագործի, բայց երեւի կռահեցիք՝ ավազակապետականի շարունակությունը․․․Փաստորեն, միակ բանը, որը քաղաքական գործունեության ընթացքում Տեր-Պետրոսյանին հաջողվել է նախկինում, Սերժ Սարգսյանին եւ Ռոբերտ Քոչարյանին իշխանության բերելն է ու պահելը, որը խափանվել է այս դահլիճում ներկա եւ ոչ միայն այստեղ ներկա մարդկանց ջանքերով։ Փաստորեն, մարտի մեկը սկզբունքային տարաձայնություն է․․․հաջողություն մաղթեմ մեր ժողովրդին եւ վստահեցնեմ, որ ավազակապետական հեղափոխությունը չի ստացվի»։
Լուիզա ՍՈՒՔԻԱՍՅԱՆ