Այս նրբահամ նախուտեստը ֆրանսիական խոհանոցից է: Պատրաստվում է շատ հեշտ, բավականին մատչելի է, օգտակար է, եւ ամենակարեւորը՝ շատ համեղ է:
Անհրաժեշտ մթերքները
Հավի լյարդ (կամ ինչպես ընդունված է ասել մեզ մոտ՝ թոք)- 1 կգ
Կաթ-500 մլ
Կարդացեք նաև
Սոխ-2 գլուխ
Գազար-1 հատ
Սխտոր-3-4 պճեղ
Բուսական յուղ- 4 ճաշի գդալ
Կարագ-200 գրամ
Բարձր յուղայնությամբ սերուցք- 50 մլ
Բրենդի (կոնյակ)- 80-100 մլ
Համեմունքներից՝
թարմ աղացած մշկընկույզ՝ 1 պտղունց, սեւ պղպեղ՝ 1 պտղունց, աղ՝ 1 թեյի գդալ, չորացրած ուրց՝ 2 պտղունց
Նախապես լավ լվացեք հավի լյարդերը, եւ որքան կարող եք արտաքին թաղանթները հեռացրեք: Այնուհետեւ լցրեք մի խորը թասի մեջ, վրան լցրեք կաթ եւ թողեք այդպես մնա մոտ 3-4 ժամ: Կարող եք նաեւ ողջ գիշեր թողնել, բայց այդ դեպքում դրեք սառնարան:
Սոխը, գազարը եւ սխտորը մաքրեք, լվացեք եւ կտրատեք: Խորը թավայի մեջ լցրեք բուսական յուղը եւ մոտ 50 գրամ կարագ: Հենց տաքանա, կրակը ցածրացրեք, որ դառնա հնարավորինս մարմանդ, կտրատած բանջարեղենը լցրեք մեջը, որ տապակվի: Բայց չթողնեք կարմրի:
Հավի լյարդը լցրեք ցանցի մեջ, կաթը թափեք, եւ լվացեք հոսող ջրով: Թողեք լավ ջրքամվի: 3-4 րոպեից, երբ բանջարեղենը շատ մարմանդ կրակի վրա թեթեւակի տապակված կլինի, ավելացրեք լյարդը: Թողեք շոգեխաշվի մոտ 10 րոպե՝ պարբերաբար խառնելով: Ընթացքում ավելացրեք բոլոր համեմունքները, ապա՝ կոնյակը, վերջում՝ կաթնասերը:
Անջատեք կրակը, վերցրեք գազօջախից, լցրեք որեւէ տարայի մեջ, ավելացրեք եւս 50 գրամ կարագ եւ լավ հարեք ձեռքի կոտորակիչով (блендер) կամ լցրեք բլենդերի թասի մեջ եւ այդպես մանրացրեք: Պետք է դառնա հարթ, համասեռ զանգված:
Լցրեք տարաների մեջ: Մնացած մոտ 100 գրամ կարագը հալեցրեք եւ լցրեք պաշտետի վրա, որ ամբողջությամբ ծածկի երեսը: Դա կպաշտպանի փչանալուց, նաեւ շատ նուրբ եւ յուրահատուկ համ կտա պաշտետին: Կարող եք ուտել սեւ հացի կամ խրթխրթան բագետի վրա քսած: Չմոռանաք հացին քսել նաեւ վրայի կարագից:
Պատրաստման մանրամասները՝ տեսանյութում.
Պատրաստեց Մելանյա ԲԱՐՍԵՂՅԱՆԸ