Վաղը մեկնարկում է Ազգային ժողովի արտահերթ ընտրությունների քարոզարշավը: ԿԸՀ-ում գրանցված քաղաքական կուսակցություններն ու դաշինքները երկու շաբաթ են ունենալու՝ ընտրողներին պատմելու Հայաստանում ճգնաժամի պատճառների, այսօրվա իրավիճակի իրենց պատկերացումների մասին, ներկայացնելու ստեղծված իրավիճակից դուրս գալու իրենց պատկերացումներն ու ծրագրերը:
Հայաստանի եվրոպական կուսակցության (ՀԵՎԿ) նախագահ Տիգրան Խզմալյանը Aravot.am-ի հետ զրույցում ասաց. «Անկեղծ ասած, մենք մինչեւ վերջին պահը, մինչեւ մայիս ամիսը չէինք նախատեսում առանձին, որպես կուսակցություն մասնակցել: Մեր գործողությունները կապված էին Ազգային-ժողովրդավարական բեւեռի հետ: Միայն մայիսի սկզբին մենք բաժանվեցինք: Այնպես որ, ընտրություններին մասնակցելու որոշումը մի փոքր հանպատրաստից էր: Հետևաբար, բացի ընդհանուր եւ բնական խոչընդոտներից, ինչպիսիք են խոսքի ազատության փաստացի բացակայությունը մեր երկրում եւ ԶԼՄ-ների մեծ մասի մենաշնորհային իրավիճակը, նախ եւ առաջ նկատի ունեմ հեռուստաալիքները, այդ ամենը թելադրեց մեզ այն ձեւաչափը, որին հիմա մենք հավատարիմ ենք: Դա հիմնականում համացանցային աշխատանք է, սոցիալական ցանցեր, Youtube ալիք, կայք, որը, ըստ էության արդեն պատրաստ է եւ առաջիկա երկու օրերին լիարժեք կաշխատի:
Մեր նախընտրական արշավի յուրահատկությունն այն է, որ ընտրացուցակի 2-րդ համար ունենալով Ռուբեն Հախվերդյան, մենք որոշեցինք կառուցել շրջայցերը նրա բացօթյա համերգ-հանրահավաքների ձեւաչափով: Առնվազն այդպիսի երեք համերգ-հանրահավաք կկազմակերպենք Գյումրիում, Վանաձորում, Երեւանում»:
Պարոն Խզմալյանը դժվարացավ դրանց օր ու ժամ նշել, քանի որ դա կախված է լինելու նրանից, թե որ քաղաքապետարանը երբ եւ որտեղ կթույլատրի: «Մնացածը Հանրային Հեռուստատեսության անվճար եթերաժամերն են: Կփորձենք նաեւ որոշ եթերաժամանակ գնել, սակայն չեմ կարծում, թե այս առումով կարող ենք մրցակցել նախկինների, ինչպես նաեւ ներկաների հետ»,-ասաց ՀԵՎԿ նախագահը:
Կարդացեք նաև
Աշոտ ՀԱԿՈԲՅԱՆ
