«Մարտական եղբայրություն» միաբանության հայտարարությունը և կոչը՝ ինքնապաշտպանության համակարգի, անկախության համար պայքարի և ՀԱՊԿ-ում Հայաստանի անդամակցության մասին
ԽՍՀՄ փլուզումից ի վեր աննախադեպ և շարունակվող անկայունացումը միջազգային հարաբերություններում, որն օրըստօրե, միայն ուժգնանալու միտում ունի՝ ավելի քան երբևէ առաջնային է դարձնում՝
– հայ ժողովրդի ինքնիշխանության
– և հայ ժողովրդի անվտանգության գերխնդիրները
Կարդացեք նաև
«Մարտական եղբայրություն» միաբանությունը կոչ է անում Հայաստանի բոլոր շահագրգիռ ուժերին, կազմակերպություններին, անհատներին, թոթափելով հանցավոր անհոգությունը՝ ջանքերը կենտրոնացնել այդ գերխնդիրներից բխող հարցերի վրա:
Ի մասնավորի.
- Հայ ժողովրդի ինքնապաշտպանության համակարգի արմատական փոփոխությունների ծրագրի մշակում և քննարկում:
Դա պետք է վերաբերի Զինված ուժերի բարեփոխմանը, ներառյալ՝
ԶՈՒ կառուցման փիլիսոփայության, բանակաշինության մոդելի և ռազմական դոկտրինի հարցերը,
այլև՝ «Զինված ժողովուրդ» գաղափարին, ներառյալ՝
աշխարհազորի, պահեստազորի նոր մոդելների, ինչպես նաև մարտական զենք կրելու իրավունքի հետ կապված օրենսդրության ու ավանդույթների փոփոխության հարցերը:
Ընդհանուր առմամբ, Հայաստանի ինքնապաշտպանության համակարգը համարժեք լինելու համար նոր իրավիճակին, պետք է աստիճանական անցում կատարի գործող՝ փաստացի սովետական մոդելից դեպի արդիական պայմաններին ու մարտահրավերներին, ինչպես նաև հայ ժողովրդի պահանջմուներին ու բնույթին համապատասխան համակարգ:
Այս թեմայի շուրջ հետագայում հանդես կգանք առանձին հայտարարություններով և նախաձեռնություններով:
- Այսօրվանից պատրաստվել Հայաստանի անկախության և ինքնիշխանության պաշտպանության պայքարին՝ քննարկելով և կազմակերպելով անհրաժեշտ քայլերը, հարթակները, ծրագրերը և գաղափարները, այլ ոչ թե սպասել այն պահին, երբ սեղանին կդրվեն Հայաստանի անկախությունը սահմանափակող կանխատեսելի առաջարկները:
- Օրակարգային դարձնել Հայաստանի ՀԱՊԿ-ում անդամակցության նպատակահարմարության խնդիրը՝ քննարկելով այս հարցը բոլոր հնարավոր տեսակետներից, դեմ և կողմ փաստարկներով ու հակափաստարկներով:
Վերջին խնդիրը հատկապես կարևոր է դառնում հաշվի առնելով.
– ՀԱՊԿ խնդրահարույց կամ զրո արդյունավետությունը Հայաստանի և հայ ժողովրդի պաշտպանության տեսակետից թե՛ 2020 թ.-ի պատերազմի, թե՛ դրան հետևած շրջանում՝ սահմանային միջադեպերի ու սադրանքների ընթացքում: Ընդ որում այս ամենը չնայած նրան, որ.
ա. Պատերազմի և հետպատերազմյան սահմանային բախումների ժամանակ անմիջապես ներառվել է ոչ միայն Արցախի, այլև ՀՀ տարածքը
բ. Պատերազմի ժամանակ ճակատում Թուրքիայի կողմից վերահսկվող սիրիական վարձկանների առկայությունը հաստատվել է Ռուսաստանի ԱՀԾ-ի (СВР) ղեկավարի պաշտոնական հայտարարությամբ
գ. Պատերազմի ընթացքում թուրքական ռազմական օգնությունն Ադրբեջանին՝ ընդհուպ մինչև թուրքական ռազմական ինքնաթիռների գործարկում՝ հաստատվել է բազմաթիվ վկայություններով, և հաստատապես իմացվել է ՀԱՊԿ բարձր մակարդակում
– Ի հակադրություն ՀԱՊԿ պասիվությանը 2020 թվի հայ-ադրբեջանական պատերազմին և հետևած դեպքերին, նույն այդ կազմակերպության կայծակնային արագությունը ղազախստանյան ներքին բախումներին արձագանքելու հարցում, և Հայաստանի ստիպողական մասնակցությունը Ղազախստանում ներքին բախումների վերացման գործում:
Փաստորեն ՀԱՊԿ-ը գոյություն չունի, երբ պետք է պաշտպանվի Հայաստանի և հայ ժողովրդի անվտանգությունը, բայց գոյություն ունի, երբ պետք է հայ զինուժի մասնակցությամբ ճնշվեն ներքին խռովությունները ՀԱՊԿ անդամ երկրներում՝ այդ խռովություններում չհիմնավորված կամ վատ հիմնավորված արտաքին ներգրավման փաստարկով:
– Վերջապես ուկրաինական պատերազմը և դրա համատեքստում Ռուսաստան-Արևմուտք հարաբերությունների աննախադեպ սրումը անկանխատեսելի հետևանքներով ու հեռանկարով, պարտադիր քննարկման թեմա է դարձնում ՀԱՊԿ-ում Հայաստանի անդամակցության հարցը՝ որքանո՞վ է դա համարժեք և արդյունավետ հայ ժողովրդի անվտանգության ապահովման գերխնդրին նոր և փոփոխվող պայմաններում:
Շեշտում ենք, որ մենք ոչ թե դնում ենք ՀԱՊԿ-ում Հայաստանի անդամության դադարեցման խնդիրը, այլ կոչ ենք անում այդ հարցի բազմակողմանի և բացառապես հայաստանակենտրոն քննարկման՝ բոլոր դեմ և կողմ տեսակետների հաշվի առնելով: Հնարավորինս բացառելով որևէ արտաքին կողմնորոշում կամ իդեոլոգիական երանգավորում, բուն քննարկման անհրաժեշտությունը, սակայն, համարում ենք կասկածից վեր:
Շեշտում ենք նաև, որ այդ քննարկումը մենք պատկերացնում ենք միայն վերը նշված ինքնապաշտպանության համակարգի արմատական բարեփոխման ծրագրի, և այլ համակարգային հարցերի հետ անպայման շաղկապված:
«Մարտական եղբայրություն» միաբանություն
