«Սա, կարելի է ասել, հանձնարարական է ՀՀ-ին»,-«Մարդու իրավունքների վիճակը ՀՀ զինված ուժերում» թեմայով հանրային քննարկման ժամանակ հայտարարեց Հելսինկյան քաղաքացիական ասամբլեայի (ՀՔԱ) Վանաձորի գրասենյակի նախագահ Արթուր Սաքունցը։
Ըստ նրա՝ սրանք առաջադրանքներ են, որոնց ուղղությամբ պետությունը՝ հանձին ՊՆ-ի, նաև քննություն իրականացնող մարմինները, քննության նկատմամբ հսկողություն իրականացնող մարմինները և քաղհասարակության ինստիտուտները պետք է տան հաշվետվություն։ Ըստ Արթուր Սաքունցի՝ սա պաշտոնական մեկնարկի սկիզբն է Նախարարների կոմիտեի հանձնարարականի կատարման համար։ Ըստ ԵԽ Նախարարների կոմիտեի հանձնարարականի՝ ՀՀ-ն մինչև 2025 թվականի ապրիլ պետք է տեղեկություններ ներկայացնի վերջին հինգ տարիներին զինված ուժերում ոչ մարտական պայմաններում մահվան դեպքերի քննության մասին։
Փաստաթղթում ամրագրված է․ «Իշխանություններին ԵԽ Նախարարների կոմիտեն հորդորել է հնարավորինս արագ միջոցներ ձեռնարկել՝ զինված ուժերում խոշտանգումների, անմարդկային կամ արժանապատվությունը նվաստացնող վերաբերմունքի մասին անանուն հաղորդումների մեխանիզմների ներդրման ուղղությամբ և այդ մասին տեղեկացնել Նախարարների կոմիտեին, ինչպես նաև զեկուցել Մարդու իրավունքների ազգային ռազմավարությունից բխող գործողությունների ծրագրի համապատասխան գործողությունների իրականացման վերաբերյալ»։
Նախարարների կոմիտեն նաև ՀՀ իշխանություններին առաջարկել է տեղեկատվություն տրամադրել զինծառայողների նվաստացումների, զինվորական ղեկավարության կողմից նրանց նկատմամբ բուլինգի և վատ վերաբերմունքի կանխարգելման միջոցառումների և այլնի վերաբերյալ։
Կարդացեք նաև
«ՀՔԱ Վանաձորի գրասենյակ» ՀԿ, իրավապաշտպան Նազելի Մովսիսյանը ներկայացրեց զինված ուժերում ոչ մարտական պայմաններում մահվան դեպքերի վիճակագրությունը 2012-2017-ի և 2018-2023-ի ընթացքում․ «Իրավիճակը մտահոգիչ է։ 2012-2017-ի ընթացքում մահվան դեպքերի թիվը մեր ուսումնասիրության համաձայն՝ 418-ն է։ Այստեղ, իհարկե, ներառված չեն քառօրյա պատերազմի հետևանքով զինծառայողների մահվան դեպքերը։ Ըստ մեր տվյալների՝ դա 77-ն է։ Ոչ մարտական պայմաններում մահվան ընդհանուր թիվը կազմում են զինծառայողների մահվան դեպքերի 66 տոկոսը՝ 279 դեպք, որը բավականին մտահոգիչ է։ Ինքնասպանություններ որակված դեպքերի թիվը 58-ն է, սպանության դեպքերը՝ 44։ Նմանատիպ վիճակագրություն արձանագրում ենք նաև 2018-2023 թվականներին, քանի որ այստեղ ևս ոչ մարտական պայմաններում զինծառայողների մահվան թիվը մեծ է՝ 81 տոկոս՝ 355 դեպք։ Նկատենք, որ հիմնականում ինքնասպանություն և սպանություն որակված դեպքերը միասին դիտարկելով՝ երկու ժամանակահատվածում էլ դրանց թիվը հիմնականում նույնն է։ Առողջական խնդիրների պատճառով մահվան դեպքերի թիվը մինչ հեղափոխությունը 102 էր, իսկ 2018-2023-ի ընթացքում՝ 97։ Ընդհանուր առմամբ 2012-2023-ի ընթացքում զինծառայողների մահվան դեպքերը կազմում են 854 դեպք, իսկ դրանց մեծ մասը ոչ մարտական պայմաններում են»։
Տաթև ՀԱՐՈՒԹՅՈՒՆՅԱՆ