Երևան քաղաքի առաջին ատյանի ընդհանուր իրավասության քրեական դատարանն այսօր որոշեց 44-օրյա պատերազմի ամենաաղմկահարույց դեպքերից մեկի՝ «Լելե Թեփեի» օպերացիայի գործով նիստը քննել դռնփակ:
Հիշեցնենք, որ այս գործով մեղադրվում են Պաշտպանության բանակի 8-րդ առանձին մոտոհրաձգային բրիգադի (Ցոր) հրամանատար Արթուր Օհանյանը, նույն զորամասի մոտոհրաձգային գումարտակի հրամանատար Գեղամ Աբրահամյանը և տանկային գումարտակի հրամանատար Գառնիկ Մնացականյանը։
Արթուր Օհանյանի պաշտպաններից Աշոտ Ապրեսյանը մեզ հետ զրույցում ասաց, որ դռնփակ քննության վերաբերյալ միջնորդության մասով իրենք ներկայացրել են իրենց առարկությունները՝ հաշվի առնելով, որ 2020-ի օպերացիան 2023-ից հետո այլևս գաղտնի նշանակություն չունի: Սակայն դատարանը որոշեց դռնփակ ռեժիմի անցնել փաստաթղթերի հետազոտման ժամանակ: Ինչի արդյունքում այսօրվա եւ հաջորդ նիստը միայն կանցկացվեն դռնփակ:
Այսօր, ըստ փաստաբանի, դատարանը հետազոտեց գաղտնիք պարունակող գրավոր ապացույցներ՝ քարտեզներ, մարտական կարգադրություններ: Այլ մանրամասներ փաստաբանը չկարողացավ հայտնել:
Կարդացեք նաև
Արփինե ՍԻՄՈՆՅԱՆ
