Կոտայքի մարզի ընդհանուր իրավասության դատարանում շարունակվում է Վարդան Պետրոսյանի ավտովթարի գործով ապացույցների հետազոտումը:
Դատավոր Վաղինակ Մկրտչյանը ներկայացրեց քրեական գործի հարուցման մասին ոստիկանության Կոտայքի մարզի քննչական բաժնի որոշումը, դեպքի վայրի նկարագրության արձանագրությունը, մեքենաների նկարագրությունը ըստ դիրքի, զննության մասնակիցների արձանագրությունները, տուժողների, տրանսպորտային միջոցների մասին արձանագրությունները: Ներկայացրեց, որ գործում առկա է լուսանկարչական հավելված՝ 8 լուսանկարից բաղկացած:
Վ. Պետրոսյանի պաշտպան Նիկոլայ Բաղդասարյանը հայտնեց, որ գործում առկա սխեման եւ հետվթարային իրավիճակի հետ կապված սխեմատիկ հատակագիծը ներկայացրեց, որտեղ կասկած հայտնեց, որ գործում եղած գծագիրը եւ անկախ փորձագիտական կենտրոնից ստացված գծագրերը չեն համապատասխանում միմյանց:
Կարդացեք նաև
Այս գործով ընթերակա Վազգեն Կարապետյանը, որի տվյալների մեջ նշված է Զորավան գյուղը, հայտնել էր, որ տվյալ հատվածից մեքենայի դիրքը եղել է 18 մետր 50 սմ, մինչդեռ դատարանում առկա գծագրի համաձայն՝ այն 13 մետր 50 սմ է եղել:
Ն. Բաղդասարյանը հայտնեց, որ ընթերակայի անձի հետ կապված՝ դիմել է ոստիկանության անձնագրային եւ վիզաների վարչություն եւ ըստ պաշտոնական տվյալների՝ 1985թ. ծնված 4 նույն անուն-ազգանունով հաշվառված եւ հաշվառումից հանելու տվյալներ չեն եղել:
Մեկ այլ հարցում էլ ուղղվել էր Զորավանի գյուղապետին, որը հայտնել է, որ իր համայնքում նման տվյալներով, անուն-ազգանունով հաշվառված անձ չկա:
Պաշտպանը նաեւ օգտվել էր ԿԸՀ պաշտոնական կայքէջից, որտեղ նման անուն-ազգանունով, ծննդյան թվով մարդ չէր հայտնաբերվել, գտնվել էին երկու հոգի՝ ավելի տարեց:
Միջնորդություններ հարուցելու ժամանակ տուժող կողմի ներկայացուցիչ Ռուբեն Բալոյանն ասաց, որ այս ամենը արվում է լրատվամիջոցների համար եւ որ հարկ եղած դեպքում հանդես կգա, որպեսզի չլուսաբանվի, եթե նման կերպ շարունակվի:
Ռուզան ՄԻՆԱՍՅԱՆ
Մանրամասները՝ քիչ հետո
