«Պարոն Սվիտալսկին, արձանագրել է այն, ինչ-որ, փաստորեն, կա Հայաստանում: Նա արձանագրել է, որ վստահության պակաս կա ընտրական գործընթացների նկատմամբ»,- Aravot.am-ի հետ զրույցում ասաց «Ծառուկյան» խմբակցության պատգամավոր Արարատ Զուրաբյանն`անդրադառնալով Պյոտր Սվիտալսկի- ՀՀ իշխանություններ վերջին օրերի «փոխհրաձգությանը»:
Այս ամենի պատճառը, ըստ մեր զրուցակցի, այն է, որ մեր իշխանությունները համոզված են`փայլուն ընտրություններ են կազմակերպել եւ այն, որ հետընտրական գործընթացներ չեն եղել, նրանց համոզում է դրանում: Ուստի, ըստ ընդդիմադիր պատգամավորի. «մարդիկ վիրավորվել են, որ ինչ-որ մի արտահայտություն ստվերում է իրենց անցկացրած, իրենց գնահատականով լավ ընտրությունները»:
Հիշեցնենք, ամեն ինչ սկսվեց նրանից, որ ՀՀ-ում ԵՄ պատվիրակության ղեկավարը հայտարարեց`ԿԸՀ-ի կազմը փոփոխության կարիք ունի`այդ կառույցի նկատմամբ ՀՀ քաղաքացիների անվստահության պատճառով: Ի հակադարձումն, իշխանական շրջանակներից դեսպանի`ՀՀ-ի ներքին գործերին միջամտելու փորձի մասին խոսեցին, ԿԸՀ նախագահն էլ դեսպանին հորդորեց`ազնիվ լինել եւ գույները չխտացնել:
Հետեւեց դեսպանի պատասխանը. «Ես չեմ հաղորդել եւ չեմ հաղորդի ուղերձներ իշխանավորներին՝ հանրային հայտարարությունների միջոցով: Մենք շատ լավ աշխատանքային հարաբերություններ ունենք, հաղորդակցման լավ միջոցներ ունենք, եւ ես գնահատում եմ դա»: Թեման այսօր կրկին քննարկվում էր: «Օգնություն տալ, չի նշանակում անընդհատ դիտողություն անել»,- ասաց ՀՀԿ խմբակցության ղեկավար Վահրամ Բաղդասարյանը`հակադարձելով դեսպանի այն դիտարկումներին, որ ընտրական գործընթացները բարեփոխելու համար անհրաժեշտ ֆինանսները ԵՄ-ն է տրամադրել:
«Այստեղ տեղին էր մի քիչ ավելի մեղմ մոտեցում դրսեւորել. թե պարոն Սվիտալսկու, թե ՀՀ իշխանությունների, թե քաղաքական գործունեությամբ զբաղվող անհատների պարտքն է հետեւողականորեն եւ մշտապես բարելավել ընտրական գործընթացների կազմակերպումը: Կարծում եմ, որ ցանկացած տեսակետ պետք է հաշվի առնվի, ոչ թե ընդդիմանալ, այն էլ այն ձեւով, ինչպես տեղի ունեցավ մեզ մոտ»,- Aravot.am-ի հետ զրույցում ասաց Արարատ Զուրաբյանը`հավելելով, որ ինքն այս ամենու արտառոց բան չի տեսնում: Կարծում է, քաղաքական գործընթացներն այդքան էլ բուռն չեն, ինչպես փորձում է ներկայացնել մամուլը:
Արդյոք ԵՄ դեսպանն իր հայտարարություններով միջամտում էր ՀՀ-ի ներքին գործերին:
Մանրամասները`տեսանյութում
Նելլի ԳՐԻԳՈՐՅԱՆ
