ԴԱՏԱՐԱՆԸ ՄԵՐԺԵՑ Երեկ Էրեբունի եւ Նուբարաշեն համայնքների առաջին ատյանի դատարանը՝ նախագահությամբ դատավոր Մարգարյանի, ընդամենը կեսժամյա քննությունից հետո մերժեց Գրիշա Վիրաբյանի բողոքն իր նկատմամբ գործը կարճելու որոշման դեմ: Հիշեցնենք, որ Վիրաբյանը վիճարկում էր այն հիմքը, որով կարճվեց իր գործը, այն է՝ թե զրկանքների գնով քավել է մեղքը: Նա պահանջում էր գործը կարճել կա՛մ հանցակազմի բացակայության պատճառով, կա՛մ ուղարկել դատարան, որ հնարավոր լինի հասնել արդարացման: Գրիշա Վիրաբյանը պատմեց, թե դատարանում հայտնել է իր տեսակետը, որ գործը կարճող դատախազը գերազանցել է իր լիազորությունները. «Նրանք իմ դեմ անհիմն գործ էին հարուցել, սակայն չէին կարողացել հիմնավորել մեղքիս բաժինը: Եվ ստանձնելով դատավորի դեր՝ որոշել են, թե ես հանցագործ եմ, սակայն կարճել են քրգործը»: Մինչդեռ դատարանը որոշել է, թե դատախազն ուներ այդ լիազորությունը: Դատավճռի ամբողջական տեքստը ստանալուց հետո Գրիշա Վիրաբյանը պատրաստվում է այն բողոքարկել վերաքննիչ դատարան: Իսկ երեկվա դատաքննության մասին ասաց. «Ես զգում էի դատավորի կարեկցանքը, բայց այն ինձ չի բավարարում: Նրանք հիմնավորում են, թե մարդասիրություն է դրսեւորվել իմ նկատմամբ: Այս գործի ընթացքում շփվեցի շատ իրավաբանների հետ, որոնք գուցե եւ շատ լավ մասնագետներ են, բայց նրանցից եւ ոչ մեկը չի ցանկանում «սպիտակ ագռավ» երեւալ: Նրանք վախենում են կատարել օրենքի տառը եւ աշխատում ինքնապահպանության բնազդով, քանի որ օրենքը պահպանելու դեպքում պիտի դեմ դուրս գան համակարգին: Նշեմ նաեւ, որ կրածս զրկանքները համարժեք չեմ համարում իմ կատարած գործողություններին: Եվ ապագայում ինձ իրավունք եմ վերապահելու հավասարեցնել զրկանքներս ու կատարածս գործողությունները»: Ա. Ի.
