ՀՐԵԱՆԵՐԸ ԿԴԻՄԵ՞Ն ԴԱՏԱԽԱԶՈՒԹՅՈՒՆ Հեռուստատեսության եւ ռադիոյի ազգային հանձնաժողովի նախագահ Գրիգոր Ամալյանից փորձեցինք պարզել, թե ինչ է պատասխանել Հայաստանի հրեական համայնքի՝ նաեւ իրեն հասցեագրված նամակին, որում անհանգստություն էր հայտնված ԱԼՄ-ով իրականացվող հակահրեական քարոզչության վերաբերյալ: «Տիգրան Կարապետյանի նմանօրինակ գործողությունները կրում են խիստ նպատակաուղղված եւ դիտավորյալ բնույթ: Այսօր? նորահայտ հեռուստատեսային այդ «ֆյուրերիկի» շուրջ գոյանում է մի կոալիցիա, որոնք, ոգեւորված այդ հեռուստաընկերության հակահրեական հայտարարությունների անպատժելիությունից, բացահայտ հայտարարում են? Հայաստանում հրեական ջարդեր կազմակերպելու մասին»,- նշել էին հրեական համայնքի ներկայացուցիչները եւ պահանջել պատասխանատվության ենթարկել ԱԼՄ ղեկավարին: Գրիգոր Ամալյանն ի պատասխան նշեց, որ թեեւ «Հեռուստատեսության եւ ռադիոյի մասին» օրենքի 24 հոդվածով իրոք արգելվում է հեռուստառադիոհաղորդումներն օգտագործել ազգային, ռասայական եւ կրոնական թշնամանք կամ երկպառակություններ սերմանելու համար, սակայն դրանք նաեւ քրեորեն պատժելի արարքներ են. «Եվ այս դեպքում ՀՌԱՀ-ը, ստանձնելով դատավորի դեր եւ տալով գնահատական, ուղղակիորեն կառաջացնի հետեւանքներ, որոնք նախատեսում են պատիժներ հեռուստատեսային գործունեությունից դուրս: Այս իմաստով՝ գերադասելի եմ համարում եւ առաջարկել եմ, որ հրեական համայնքը սահմանված կարգով դիմի դատախազություն»: Նշենք, որ ինքը՝ ԱԼՄ ղեկավարն այս դիմումի առնչությամբ արդեն իսկ հայտարարել է մամուլում, թե հրեա ժողովրդին վերաբերվում է նորմալ. «Բայց ինձ համար տարօրինակ է, երբ չունենալով որեւէ փաստ, թե ես հրեա ժողովրդի դեմ որեւէ վատ բան եմ ասել, հրեական համայնքը նման նամակ է հղել։ Միակ բանը, որ ասել եմ, այն է, երբ Հմայակի քայլը բնութագրել եմ որպես «ջհուդական», ինչը ոչ մի կապ չունի հրեա ժողովրդի հետ»: Տիգրան Կարապետյանը նաեւ կարծիք է հայտնել, թե համայնքը մտորելու դեպքում կհասկանա, թե նման աղմուկ բարձրացնելը հենց իրենց ձեռնտու չէ. «Եթե ձգտեն իմ հանդեպ ինչ172ինչ գործողություններ, հալածանքներ սկսել, համարժեք պատասխան կստանան»։ Ա. Ի.
