«Դո»-ն «ռե»-ից չի տարբերում» Գյումրիի թիվ 4 երաժշտական դպրոցի տնօրենին աշխատանքից ազատել են բակը չգեղեցկացնելու համար: Փոխարենը նշանակվեց բիզնեսմեն: Մի քանի օր է Գյումրիում շարունակվում է հիշյալ դպրոցի աշխատակազմի բողոքի ակցիան՝ ընդդեմ Գյումրիի քաղաքապետարանի: Հունվարի 13-ին քաղաքապետի հրամանով, «առանց նախազգուշացման» աշխատանքից ազատվել է Ա. Բրուտյանի անվան երաժշտական դպրոցի տնօրեն Վարդգես Ադամյանը: Փոխարենը տնօրեն նշանակվել է երգահան Սուրեն Կնյազյանը: Դպրոցի ուսուցիչների բնութագրելով, վերջինս իրենց բնագավառի հետ առնչություն չունի, «դո»-ն «ռե»-ից չի տարբերում, Բեթհովենի անունն էլ լսած չկա, ավելին՝ հայտնի բիզնեսմեն է ու քաղաքապետի մերձավորը»: «Դա նույնն է, եթե ֆուտբոլի մարզիչ նշանակես շախմատիստին», ասում էր նրանցից մեկը: Սակայն «սեւ գործը» պարզաբանելու բարդ պատասխանատվությունը իր վրա վերցրեց ոչ թե Գյումրիի քաղաքապետը կամ մշակույթի բաժնի պետը (ի դեպ, արդեն 2-րդ ամիսն է՝ այս պաշտոնը եւս թափուր է, Աշոտ Մկրտչյանին եւս ազատել են աշխատանքից), այլեւ քաղաքապետի տեղակալ Գագիկ Մանուկյանը: Վերջինս տեղական հեռուստաալիքներով հայտարարեց, որ տնօրենի աշխատանքում նկատվել են լուրջ բացթողումներ ու որպես այդպիսին՝ մատնանշեց բակը չգեղեցկացնելը, քաղաքապետարան այցելած հանձնախմբին էլ «գեղագիտական հաճույք» չպատճառելը: Փոխքաղաքապետի այս «մասնագիտական» բացատրությունը նոր թափ հաղորդեց երաժիշտների կրքերին: Երաժշտական դպրոցը «փրկելու» նպատակով շաբաթ օրը կոլեկտիվը նախկին տնօրենի հետ համատեղ մամուլի ասուլիս էր հրավիրել ժուռնալիստների «Ասպարեզ» ակումբում: Ասուլիսի հենց սկզբում աշխատանքից ազատված Վարդգես Ադամյանը ձեռ առավ, թե «նա, ով կարծում է՝ ձմռանը դպրոցի բակում պետք է աճեցվեն ձմեռային վարդեր ու մեխակներ, իսկ դպրոցի մուտքի մոտ կանգնած լինի երգչախումբը ու բոլորին երգերով դիմավորի՝ վարդեր բերեմ պարտեզից կամ մեխակներս ու՞մ նվիրեմ, չարաչար սխալվում է»: Սակայն նախկին տնօրենը միաժամանակ հայտարարեց, որ ինքը «չի զարմանում, չի դժգոհում, չի բողոքում», որովհետեւ այն մեծ պաշտոն չէ եւ ինքը ամենեւին էլ ցանկություն չունի «կառչած» մնալ դրան: Նա նաեւ տեղեկացրեց, որ մտադրված է մեկնել ՌԴ, քանի որ տնօրեն աշխատելու համար իր տվյալները քաղաքապետարանի պահանջներին չի համապատասխանում. քաղաքում ոչ բիզնես ունի, ոչ շքեղ ավտոմեքենա, ոչ էլ բնակարան, այլ ընդամենը ունի անօթեւանի կարգավիճակ: Իսկ կոլեկտիվի անդամները երեկ բողոքով եկան քաղաքապետարան՝ պահանջելով կասեցնել «անարդար» որոշումը: Սակայն փոշմանած հետ դարձան, քանի որ քաղաքապետը «ընդունեց, համոզեց ու ճանապարհեց»: ՆՈՒՆԵ ԱՐԵՎՇԱՏՅԱՆ
