Անցած շաբաթ «էկոնոմ կլասով» Բաքու էր մեկնել «Ժառանգություն» խմբակցության քարտուղար Ստեփան Սաֆարյանը:
Ստեփան Սաֆարյանը Բաքվում միակ հայն էր, որը մասնակցում էր Սեւծովյան տնտեսական համագործակցության խորհրդարանական վեհաժողովի մշակույթի, գիտության եւ կրթության մշտական հանձնաժողովի նիստին: Եվ երեկ «Հայացք» ակումբում պրն Սաֆարյանն այցից ծնված մի շարք մտահոգություններ փոխանցեց լրագրողներին:
«Նման դեպքերում ցանկալի է, որ հայկական պատվիրակությունը Բաքու մեկնի այնպիսի ինքնաթիռով, որտեղ կա բիզնես կլաս: Տվյալ պարագայում տոմսերը վերցվեցին Թբիլիսիով: Ինքնաթիռը բավականին փոքր էր, եւ, ըստ էության, դու խառնված էիր ադրբեջանցի ուղեւորների հետ: Ընդ որում՝ ինքնաթիռում քո անվտանգության ապահովման որեւէ միջոցառում ձեռնարկված չէր,- նշեց Ստեփան Սաֆարյանը:- Չեմ ուզում ասել, թե ինքնաթիռում խնդիրներ եմ ունեցել: Բացարձակապե՛ս: Ամենեւի՛ն: Բայց կարծում եմ, պատվիրակություն ուղարկող կողմի պարտականությունն է նվազեցնել հնարավորինս բոլոր ռիսկերը, որոնք կարող են ծագել»:
«Ժառանգության» քարտուղարի մեկ այլ նկատառումն էր, թե ցանկալի է, որ Հայաստանի պատվիրակությունը մեկ անձով ներկայացված չլինի: ԱԺ-ն, ըստ Սաֆարյանի, կարող էր իր հետ Բաքու ուղարկել նաեւ պատվիրակության քարտուղարին, սակայն, ինչպես ԱԺ նախագահ Տիգրան Թորոսյանն է բացատրել նրան՝ քարտուղարներն ուղեկցում են միայն պատվիրակությունների ղեկավարներին: Մինչդեռ Ստեփան Սաֆարյանը նկատեց, որ այլ երկրների պատվիրակությունների անդամներին ուղեկցել են քարտուղարները: Նաեւ նշեց, թե անկախ մեր ԱԺ-ում որդեգրված սկզբունքներից՝ պիտի հաշվի առնեն, թե ինչ երկիր են ուղարկում. «Ես Ստրասբուրգում գուցե ընդհանրապես որեւէ մեկի կարիքը չունենայի: Եվ եթե ինձ հետ Բաքու մեկներ անգամ Գագիկ Ծառուկյանի կամ որեւիցե մի օլիգարխի թիկնազորը, միեւնույն է՝ դա ինձ չէր փրկելու: Քարտուղարի ներկայությունն այնտեղ ուներ մասնավորապես հետեւյալ նշանակությունը՝ հյուրանոցում քեզ մենակ չէիր զգա, գոնե մարդ կլիներ, որի հետ կզրուցեիր»:
Ստեփան Սաֆարյանը պատմեց, թե բավական լարված իրավիճակ էր Ադրբեջանում. «Ես, իհարկե, ադրբեջաներեն չէի հասկանում, բայց հետեւելով օրվա լրահոսին իրենց «Հայլուրի» միջոցով՝ ակնհայտ էր, որ «դուշման» բառն ուղղակի անընդհատ կար: Ասենք, նիստի ընթացքում իմ ելույթ ունենալուց 1 օր առաջվա լրատվական թողարկման մեջ շեշտվում էր, թե 3 շրջաններում «դուշմանն» անցավ հարձակման: Այսինքն՝ բավականին վտանգավոր էր: Առավոտից-իրիկուն դա էր: Անգամ նկատեցի, որ մոդայի ցուցադրության դեպքում էլ երաժշտության մեջ էլի դուշման բառն առկա էր»:
Սակայն, ըստ նրա, ադրբեջանական կողմն արել է առավելագույնը՝ երեւալու «հյուրընկալ, նրբանկատ ու կոռեկտ»: Հանձնաժողովի նիստի ընթացքում որեւէ անդրադարձ չի եղել ԼՂ խնդրին: Նաեւ ձեռնարկվել են հայ պատգամավորի անվտանգության «իմ կարծիքով՝ աննախադեպ միջոցառումներ»:
Եվ այս պայմաններում բավական աննրբանկատ պահվածք է դրսեւորել ԱԺ փոխնախագահը: «Ինձ համար տհաճ է, երբ իմ գործընկերներից որոշները կարող էին չհասկանալ, թե Բաքվում գտնվում է հայ պատվիրակ եւ՝ միայնա՛կ, ու նույն շրջանում կարող էին հայտարարություններ անել Բաքվի նավթահանքերը պայթեցնելու մասին: Այս հարցի պատասխանը ես անշուշտ կփորձեմ ստանալ Վահան Հովհաննիսյանից, որը «Ռեգնում»-ին տված հարցազրույցում նույն օրերին հանկարծ հիշեց, որ եթե Ադրբեջանը հարձակվի, ապա հայկական կողմը կպայթեցնի Բաքվի նավթահանքերը,- ասաց Ստեփան Սաֆարյանը:- Եթե ինքն իրեն համարում է փորձառու քաղաքական գործիչ, ապա ինչպե՞ս է պատկերացնում՝ ի՞նչ կարող էր տեղի ունենալ, եթե Բաքվում մարդիկ նման հայտարարություններ են ընթերցում, եւ այդտեղ հայ խորհրդարանական կա: Եվ հարց ունեմ. եթե այս պատվիրակությունում ՀՅԴ ներկայացուցիչ Արա Նռանյանը լիներ Բաքվում՝ Վահան Հովհաննիսյանը նույնատիպ հայտարարություն կանե՞ր, թե՞ ոչ»:
