![\"\"](\"https://www.aravot.am/2008/aravot_arm/October/10/p1.gif\")
Երեկ ֆրանսահայ, արցախյան ազատամարտի մասնակից Սարգիս Հացպանյանին հայրենիքից արտաքսելու իշխանությունների փորձը դատապարտող հայտարարություններով հանդես են եկել Հայ ազգային կոնգրեսը եւ Հայաստանի ժողովրդական կուսակցությունը: ՀԱԿ-ը, արձանագրելով, որ Հացպանյանը ՀՀ-ում, Սփյուռքում եւ ԼՂ-ում քաջ հայտնի եւ այն եզակի սփյուռքահայերից է, որը 1988թ.-ի Շարժման առաջին օրերից նվիրվեց շարժմանը, դարձավ պատերազմի հերոս, Ղարաբաղին ամենաբազմազան օգնություններ կազմակերպեց, ինչի մասին «շատ լավ գիտեն ե՛ւ Ռ. Քոչարյանը, ե՛ւ Սերժ Սարգսյանը», նկատել է. «Այդ ամենը նրանց համար ի չիք դարձավ, երբ պարզվեց, որ Ս. Հացպանյանը համաժողովրդական շարժման կողմնակիցն է։ Մարտի 1-ի սպանդից հետո Ազատության հրապարակում իր մի քանի ելույթների համար հետապնդումների ենթարկվեց նաեւ Սարգիս Հացպանյանը։ Վերջին օրերին, երբ նա վերադարձել է իր բնակարան, ոստիկանությունը շրջափակել է այն՝ հանձնարարություն ունենալով նրան բռնի արտաքսել Հայաստանից»։ ՀԱԿ-ի գնահատմամբ, Ս. Հացպանյանին Հայաստանից արտաքսելու որոշումը անհիմն է, անբարոյական եւ կոպտորեն խախտում է ՀՀ մի շարք օրենքներ: Իսկ ՀԺԿ քաղխորհրդի անդամ Ռուզան Խաչատրյանը երեկ «Ա1+»-ին տված հարցազրույցում ասել է. «Կատարվածն ապացուցում է, որ Հայաստանում դեռ առաջնորդվում են Հատուկ քննչական ծառայության պետ Անդրանիկ Միրզոյանի հանձնարարականով՝ շարունակում են հետեւել ընդդիմության ակտիվիստներին, գաղտնալսել նրանց, ինֆորմացիա հավաքել նրանց հարեւաններից եւ մտերիմներից»:
Կարդացեք
