Լի Չանչունը նշել է, որ ՉԺՀ Կոմկուսն ու կառավարությունը լուրջ ուշադրություն են դարձնում հայ-չինական հարաբերություններին, ողջունում են ՀՀ հավատարմությունը «Մեկ Չինաստանի» քաղաքականությանը, ձգտելով հայկական կողմի հետ համատեղ փոխադարձ հարգանքի, հավասարության եւ փոխշահավետ գործակցության հենքի վրա զարգացնել երկկողմ հարաբերությունների մակարդակն՝ ի բարօրություն երկու երկրների ժողովուրդների։ Լի Չանչունն արտահայտել է ՉԺՀ կոմկուսի ձգտումը՝ միջկուսակցական կապերի չորս հայտնի սկզբունքների հիման վրա զարգացնել բարեկամական փոխգործակցությունը, սովորել միմյանցից եւ կատարել փորձի փոխանակում՝ ի շահ երկու երկրների միջպետական հարաբերությունների խորացման։ Հանդիպման ընթացքում Չանչունը հայկական պատվիրակությանը ծանոթացրել է քաղաքական ռեֆորմների արդյունքների եւ երկրի արդիականացման ծրագրերի հետ։ Գագիկ Ծառուկյանն իր հերթին խոսել է Չինաստանի լրջագույն նվաճումներից ստացած խոր տպավորությունների մասին, որոնց երկիրը հասել է բարեկեցության եւ բարեփոխումների երեսնամյա քաղաքականության արդյունքում։ Նա շեշտել է «Բարգավաճ Հայաստանի» ձգտումը՝ զարգացնել հարաբերությունները Չինաստանի Կոմունիստական կուսակցության հետ, առաջ մղելով երկկողմ համագործակցությունը քաղաքականության, տնտեսության, սպորտի եւ այլ ոլորտներում։R
