Հայաստանի նախագահ Սերժ Սարգսյանն ասել է, որ Հայաստանը համագործակցում է ՆԱՏՕ-ի հետ, սակայն չի ցանկանում դառնալ դաշինքի անդամ, որպեսզի տարածաշրջանում չստեղծի նոր բաժանարար գծեր:
«Մեդիամաքս» գործակալությունը, վկայակոչելով «Իտառ-ՏԱՍՍ»-ին, տեղեկացնում է, որ ՀՀ նախագահն այդ մասին ասել է Frankfurter Allgemeine-ի հետ հարցազրույցում:
«Մենք հավատում ենք, որ ՆԱՏՕ-ի հետ համագործակցությունը մեր անվտանգության համակարգի մի մասն է: Սակայն մենք չենք ցանկանում նրա անդամ դառնալ: Նոր բաժանարար գծերի անցկացումն այս տարածաշրջանում կարող է չափազանց վտանգավոր լինել: Դա վրաստանյան պատերազմի դասն է»,- ասել է նա:
«Մեր քաղաքականությունը վերջին 10 տարիներին եղել է հետեւյալը. մենք հավասարակշռություն ենք փնտրել Ամերիկայի, Ռուսաստանի եւ ՆԱՏՕ-ի շահերի միջեւ: Այդ ուժերի միջեւ հակասություններից օգուտ քաղելը կարող է շատ հրապուրիչ, սակայն նաեւ շատ վտանգավոր լինել»,- եզրափակել է Հայաստանի նախագահը: