Երեկ մայրաքաղաքի Ջոն Կիրակոսյանի անվան N20 դպրոցի մարզադահլիճում մեկնարկեց «Ֆուտբոլը հանուն հավասար հնարավորությունների» ֆուտզալի երկրորդ մրցաշարը, որին մասնակցում են զանգվածային լրատվամիջոցների թիմերը:
Մրցաշարը նախաձեռնել է «Հույսի կամուրջ» հասարակական կազմակերպությունը՝ «Արեւածաղիկ» մանկապատանեկան ամսագրի հետ համատեղ: Ինչպես անցած տարի, այս անգամ էլ միջոցառումն անցկացվում է հաշմանդամ մարդկանց իրավունքների պաշտպանության միամսյակի շրջանակներում եւ նպատակ ունի քարոզել մեր հասարակության մեջ հաշմանդամ մարդկանց համար հավասար հնարավորությունների ապահովման գաղափարը:
Այդ քարոզին իր մասնակցությունով միացել է ութ թիմ՝ «Մեծ Ֆուտբոլ», «Մեդիամաքս», «Հանրային հեռուստաընկերություն», «Երկիր Մեդիա», «Չորրորդ իշխանություն», «Արեւածաղիկ», «Թերթ.am» եւ «Հայկական շոուբիզնես»: Ընդ որում, նշված թիմերից մի քանիսը նաեւ այլ լրատվամիջոցների աշխատակիցներով համալրված յուրատեսակ հավաքականներ են:
Արդեն երկրորդ անգամ մրցաշարի կազմակերպմանն աջակցում է Հայաստանի ֆուտբոլի ֆեդերացիան, որը բոլոր հանդիպումներն անշահախնդրորեն սպասարկելու է գործուղել բարձրակարգ մրցավարների: Իսկ մասնակիցների բժշկական ապահովումը ստանձնել են Երեւանի պետական բժշկական համալսարանի մասնագետները:
Միջոցառմանը միացել է նաեւ «Կոկա-Կոլա ՀԲՔ Արմենիան» ընկերությունը, որը մրցանակներ եւ, ինչպես իրենք են խոստանում, անակնկալներ է պատրաստել հաղթող թիմի եւ մրցանակակիրների համար: Իսկ մինչ այդ, ընկերությունը ֆուտբոլային դարպասներ է նվիրել մրցաշարը նույնպես անշահախնդիր հյուրընկալող դպրոցին:
Նախատեսված է միջոցառումը եզրափակել «Ֆուտբոլը՝ հանուն հավասար հնարավորությունների» մրցաշարի գավաթակրի եւ «Made in Armenia-2008» ֆուտբոլի սիրողական մրցաշարի հաղթող «Կոկա-Կոլա» թիմերի միջեւ:
Եվ վերջում տեղեկացնենք, որ մրցաշարն իրականացվում է «Առաքելություն արեւելք» դանիական կազմակերպության աջակցությամբ, իսկ ֆինանսական աջակիցը Դանիայի միջազգային զարգացման գործակալությունն է:
