Սիրողական բռնցքամարտի միջազգային ֆեդերացիայի գլխավոր համակարգող Իվան Խոդաբաշը մեկօրյա աշխատանքային այցով ժամանել էր Երեւան: Այցի նպատակը եղել է մայիսի 23-30-ը Կարեն Դեմիրճյանի անվան մարզահամերգային համալիրում անցկացվելիք բռնցքամարտի աշխարհի պատանեկան առաջնության նախապատրաստության ընթացքին տեղում ծանոթանալը:
Հայաստանի բռնցքամարտի ֆեդերացիայի մամուլի ծառայությունից տեղեկացնում են, որ պարոնայք Խոդաբաշը եւ ՀԲՖ-ի նախագահ Արման Մուրադյանը այցելել են մարզահամերգային համալիր, որտեղ համակարգողը ծանոթացել է մարզակառույցում կատարված եւ կատարվող բոլոր աշխատանքներին, այդ թվում նաեւ՝ կազմակերպական բնույթի: Այնուհետեւ Իվան Խոդաբաշը եւ Հայաստանում մարզաձեւի ղեկավարը շրջել են այն հյուրանոցներում, որտեղ հանգրվանելու են աշխարհի տարբեր երկրներից ժամանող պատվիրակությունները, իսկ վերջում քննարկել աշխարհի առաջնության անցկացմանն առնչվող այլ խնդիրներ: ԱԻԲԱ-ի գլխավոր համակարգողը գոհ է մնացել կատարված եւ կատարվող աշխատանքների ընթացքից:
