Սերբական եւ միջազգային ԶԼՄ-ները երեկ ամբողջ օրը տագնապի ազդանշան էին հնչեցնում. երկու նռնակով զինված մի տղամարդ, ներխուժել էր Սերբիայի նախագահ Բորիս Տադիչի նստավայր: Երեկոյան պարզվեց, որ Տադիչը նստավայրում չէ, իսկ նռնակավորը ոչ թե խելագար է, ինչպես ենթադրում էին սկզբում, այլ՝ հուսահատ բիզնեսմեն Դրագան Մարիչը: Ուշ երեկոյան ոստիկաններն արդեն վնասազերծել էին Մարիչին, որը նախագահական նստավայր էր ներխուժել կեսօրին մոտ, եւ սպառնացել պայթեցնել ինքն իրեն, եթե չվերանայվի իր գործով դատավճիռը: 1992 թվականին Jat-Airways ավիաընկերությունը $1 մլն 355 հազարի տրանսֆերտը որպես վարկ է ձեւակերպել Մարիչի՝ Իրանում գտնվող ֆիրմաներից մեկի համար: Եվ հետո դիմել է դատարան՝ պահանջելով Մարիչից՝ վերադարձնել պարտքը: Դատարանը վճիռ է կայացրել հօգուտ ավիաընկերության՝ ինչի արդյունքում Մարիչի ընկերությունը սնանկացել է:
2004-ին հուսահատ Դրագան Մարիչը ութսունօրյա հացադուլ էր հայտարարել՝ որպես բողոքի նշան դատավճռի դեմ:
