Մեկ անգամ չէ, որ արձանագրել ենք, որ ընթացիկ տարին անբարենպաստ էր Սյունիքի մարզի գյուղատնտեսության համար: Նախ՝ գարնան ցրտահարությունները 10 միլիարդ դրամի վնաս հասցրեցին մարզի այգեգործությանն ու բանջարաբոստանային կուլտուրաներին: Հետո էլ, ամռան սկզբներին պարբերաբար տեղացող հորդառատ անձրեւներն ու կարկուտը էլ ավելի վատթարացրին գյուղացիների վիճակը՝ լիովին մարելով բերք ստանալու նրանց վերջին հույսերը:
Անբարենպաստ եղանակի պատճառով բավականին մեծ թիվ է կազմում նաեւ հացահատիկային մշակաբույսերին հասցված վնասը: Սյունիքի մարզպետարանում ստեղծված հանձնաժողովի ուսումնասիրությունների համաձայն՝ հացահատիկային մշակաբույսերի ցանքատարածություններին հասցված վնասը կազմում է 862,5 միլիոն դրամ: Տուժած 37 համայնքներից ամենաշատ վնասը գրանցվել է Ներքին Խնձորեսկ գյուղում՝ 73 միլիոն դրամ:
Ինչպես տեղեկացնում են Սյունիքի մարզպետարանի գյուղատնտեսության եւ բնապահպանության վարչությունից՝ ցրտահարությունից, կարկտահարությունից եւ գերխոնավությունից ընթացիկ տարում մարզի գյուղատնտեսությանը հասցված վնասների բոլոր արդյունքները ներկայացվել են գյուղնախարարություն, բայց մինչ օրս տուժած գյուղատնտեսական ոչ մի տնտեսություն դեռ չի փոխհատուցվել:
