![\"\"](\"https://www.aravot.am/2009/aravot_arm/December/12/p5.jpg\")
Մարդու իրավունքների պաշտպանության միջազգային օրվա կապակցությամբ նախորդ օրը զբաղեցվել էին էլիտար «օֆիսներն» ու հյուրանոցները:
Իրավապաշտպան գործունեությամբ միայն այդ օրը զբաղվողները շատերին չէին հրավիրել եւ ստացվեց, որ իրենք լսեցին իրենց:
Երեկ նախկին դատապարտյալների «Հուսո առագաստ» հասարակական կազմակերպության նախագահ Գեւորգ Կոշկարյանն «Առավոտին» տեղեկացրեց, որ թվով 100 նախկին դատապարտյալներ բնակվում են Վարդաշենի 6-րդ փողոցի թիվ 66 եւ 68 շենքերում: Դատապարտյալների երեխաները թվով 200-ն են: Նրանցից շատերը չունեն աշխատանք: Գ. Կոշկարյանի նախաձեռնությամբ նրանք 2 ամիս զբաղվեցին «Ազատություն» սուրճի փաթեթավորմամբ, սակայն չդիմացան հարկայինի բեռին:
Գ. Կոշկարյանը դիմել էր հարկային մարմիններին, առժամանակ հարկեր չպահել իրենցից, քանի որ «զրոյից ցածր մարդիկ են»: «Ազատությունը» փակվեց, եւ կազմակերպության նախագահը դիմում է բարեսիրական կազմակերպություններին:
Վերջերս Կենտրոնի թաղապետը 150 քմ արտադրական տարածք է տվել դատապարտյալներին՝ մինչեւ 2025թ. անհատույց օգտագործման նպատակով:
Գ. Կոշկարյանը տեղեկացնում է, որ դատապարտյալներն ամաչում են իրենց անցյալից եւ զբաղվածության կենտրոններ չեն գնում: Նրա կարծիքով, ճիշտ կլիներ, որպեսզի այդ կենտրոններում իրենք ունենան «իրենց մարդը» եւ խտրականություն չդրվի աշխատանքի առաջարկման ժամանակ:
Կազմակերպության ղեկավարն ասաց, որ այս պահին հանրակացարանում մահամերձ վիճակում է գտնվում «հեպատիտ C»-ով տառապող՝ նախկինում դատված Վարդգես Փաշայանը: Դատապարտյալները դիմել են առողջապահության նախարարություն՝ պետպատվերով բուժծառայության խնդրանքով, սակայն մերժվել են:
Այս հանրակացարանում սովից ու դժվարություններից մահացավ «Չենջ» մականունով հայտնի դատապարտյալը: Սգո արարողությունն արեցին ծայրահեղ թշվառության մատնված դատապարտյալների ընտանիքները:
Դատապարտյալներից շատերը օրավարձով աշխատանքներ են կատարում «ֆայլաբազարում»:
Շուտով Ամանոր է: Դատապարտյալների երեխաներն անցյալ տարի առաջին անգամ տեսան «կենդանի Ձմեռ պապ ու Ձյունանուշիկ», շնորհիվ Արմեն Մազմանյանի եւ նրա թատրոնի դերասանների: Գ. Կոշկարյանն ասում է, որ նախկին դատապարտյալները, որոնք բնակվում են հանրակացարանում, հանցագործություն չեն կատարել այդտեղ տեղափոխվելուց հետո:
