Մրցավարների աչառու խաղավարությունն ընթացավ ամենայն հավանականությամբ՝ «Չեվակատայի» սեփականատեր Արկադի Պողոսյանի գիտությամբ կամ հրահանգով: Բասկետբոլի Եվրոպայի գավաթի 2009/10 թթ. խաղարկության 5-րդ փուլում Երեւանի «Հատիս» կանանց թիմը Վոլոգդայում հյուրընկալվեց տեղի «Չեվակատային» եւ պարտվեց 82:91 հաշվով:
«Հատիսի» պաշտոնական կայքից տեղեկանում ենք, որ տանտերերը մեր թիմի նկատմամբ առավելության հասնել կարողացել են միայն բացահայտ մրցավարական կողմնակալության շնորհիվ, ինչում հայ մարզասերներին համոզելու նպատակով ակումբի ղեկավարությունը մտադիր է խաղի տեսագրությունը Երեւանում հեռարձակել հեռուստատեսությամբ: Կայքը «Հատիսի» երկրպագուներին վստահեցնում է, որ տեսաերիզը դիտելով՝ նրանք կհամոզվեն, որ այդպիսի կողմնակալություն չի եղել անգամ Աթենքում եւ Ստամբուլում, որտեղ նույնպես մրցավարներն ավելի բարի աչքով են նայել դաշտի տերերին:
Այս խաղից առաջ «F» խմբում միայն «Չեվակատան» էր, որ տանուլ էր տվել նախորդ բոլոր չորս հանդիպումները եւ իրավիճակը ինչ-որ ձեւով շտկելու միակ հնարավորությունը եղել է «Հատիսի» նկատմամբ ինչ գնով էլ լինի հաղթանակ տանելը, այն էլ՝ առնվազն 4 միավորի առավելությամբ (նրանց երեւանյան հանդիպումն ավարտվել է մեր աղջիկների հաղթանակով՝ 103:99): Դաշտի տերերն անազնիվ ճանապարհով հասան նպատակին:
Ինչեւէ: Եղածը՝ եղած է: Հիմա հաջորդ փուլ անցնելու համար ամեն բան կախված է դեկտեմբերի 17-ին «Միկա» ակումբի դահլիճում կայանալիք «Հատիս»-«Բեշիկթաշ» խաղից եւ նույն օրը Վոլոգդայում «Չեվակատայի» եւ «Աթինաիկոսի» հանդիպման արդյունքից:
Խմբային մրցաշարի վերջին տուրից առաջ «F» խմբի մրցաշարային աղյուսակն այսպիսի տեսք ունի:
1. Աթինաիկոս 5 4 1 431-346 9
2. Բեշիկթաշ 5 3 2 365-385 8
3. Հատիս 5 2 3 405-446 7
4. Չեվակատա 5 1 4 405-429 6