![\"\"](\"https://www.aravot.am/2010/aravot_arm/January/14/p19.jpg\")
Արտասահմանյան լրատվամիջոցները տեղեկացնում են, որ աշխարհի նախկին բացարձակ չեմպիոն ամերիկացի Ջերմեն Թեյլորը աշխարհի վեց ուժեղագույն գերմիջին քաշայինների միջեւ անցկացվող «Super Six World Boxing Classic» մրցաշարի աշնանը կայացած մեկնարկային մենամարտի 12-րդ ռաունդում Արթուր Աբրահամից կրած ծանրագույն նոկաուտով պարտությունից հետո որոշել է հրաժարվել հետագա պայքարից: «Ես բռնցքամարտում եմ շուրջ 20 տարի եւ ցանկանում եմ մարմնիս ժամանակավոր հանգիստ տալ, որպեսզի հետագայում կրկին սպորտ վերադառնամ,- հայտարարել է Թեյլորը:- Այս որոշումը կայացնելն ինձ համար հեշտ չէր: Դրանից առաջ խորհրդակցել եմ ընտանիքիս ու մարզչիս հետ ու եկել այն եզրակացության, որ այսպես ավելի ճիշտ է: Կրկնում եմ, որ ընդմիշտ չեմ հեռանում, այլ մի որոշ ժամանակով»:
Որ Թեյլորն ամենայն հավանականությամբ կլքի մրցաշարը՝ սպասվում էր: Բայց ո՞վ է փոխարինելու նրան: ԶԼՄ-ները որպես թեկնածուներ տալիս էին Չեդ Դոուսոնի եւ Լուչանո Բուտեի անունները: Սակայն ամերիկացի հանրաճանաչ պրոումոթեր Լու Դիբելլան մարզիկի հրաժարականից անմիջապես հետո լրատվամիջոցներին հայտարարել է, թե «Super Six World Boxing Classic»-ի երկրորդ ռաունդում Ջերմեն Թեյլորի փոխարեն WBA վարկածով աշխարհի չեմպիոն Անդրե Ուորդի հետ ապրիլի 17-ին կհանդիպի փետրվարի 5-ին ռինգ մտնող Ալան Գրին-Սակիո Բիկա զույգի հաղթողը:
