Ինչպես բացահայտել են շվեդ գիտնականները, «քաղցի հորմոնը»՝ գրելինը, հակում է առաջացնում ալկոհոլի նկատմամբ: Գրելինը, որն արտադրում է ստամոքսը եւ ենթաստամոքսային գեղձը, հայտնաբերվել է 1999 թվին: Նախկինում արված հետազոտությունները ցույց տվեցին, որ այն մասնակցում է քաղցի զգացման ձեւավորմանը եւ հանգեցնում է այնպիսի հիվանդությունների, ինչպիսիք են ճարպակալումը եւ նեյրոգենային անորեքսիան: Բացի դրանից, գրելինը խթանում է սոմատոտրոպինի (աճի հորմոն) արտադրությունը եւ պտղի թոքերի զարգացումը, նվազեցնում է քնի տեւողությունը, լավացնում է հիշողությունը եւ դասերը սերտելն ավելի է հեշտացնում: Քանզի, ինչպես գիտենք, քաղցած ժամանակ ինչ-որ բան սովորելն ավելի հեշտ է: Գետերբուրգյան համալսարանի գիտնականները մկներին գրելին էին ներարկում, որից հետո «առաջարկում» էին խմել կամ սովորական ջուր, կամ որեւէ ալկոհոլային խմիչք: Մեծամասամբ մկները նախընտրում էին ոգելից խմիչքներ: Երբ նույն ընտրության առջեւ կանգնեցնում էին այն մկներին, որոնք զրկված էին գրելինի ընկալիչներից, նրանք, ընդհակառակը, չէին հետաքրքրվում ոգելից խմիչքներով: Գիտական Faculty of 1000 Biology ինտերնետ-ռեսուրսի գրախոսի՝ Կենտ Բերիդջի խոսքերով, շվեդ գիտնականների այս հայտնագործությունը կարող է հիմք հանդիսանալ հարբեցողության բուժման նոր ռազմավարության մշակման համար: