![\"\"](\"https://www.aravot.am/2010/aravot_arm/January/21/p10.jpg\")
Ռուսաստանի իշխանությունները, երկյուղ ունենալով երկրի բնակչության նվազման տեմպերի առնչությամբ, դիմել են ոչ ավանդական «դեղամիջոցների»: Reuters-ի մատուցմամբ, ՌԴ նախագահ Դմիտրի Մեդվեդեւը Վլադիմիր Պուտինի գլխավորած կառավարությանը հանձնարարել է ուսումնասիրել սերմնահեղուկի բանկերի թիվն ավելացնելու եւ բազմակնության օրինականացման հարցերը: Ի դեպ, նման նախաձեռնությամբ հանդես է եկել ՌԴ Պետդումայի նախագահի տեղակալ, Լիբերալ-դեմոկրատական կուսակցության առաջնորդ Վլադիմիր Ժիրինովսկին: «Տղամարդկանց տանք 100-հազարական ռուբլի՝ եւ բեղմնավորումը ապահովված կլինի»,- վստահեցրել է նա՝ ծիծաղից փռթկացնող պետպաշտոնյաներին:
Վերլուծաբանները համարում են, որ բնակչության թվաքանակի նվազումը սպառնալիքի տակ է դնում Ռուսաստանի տնտեսության մրցունակությունը: Նրանք նաեւ աշխատանքի տեղավորման ոլորտում դեֆիցիտի ճգնաժամը պայմանավորում են առողջապահության վատ համակարգով, թմրամոլության, ալկոհոլիզմի առկա բարձր մակարդակով: