Հոնդուրասի նորընտիր նախագահ Պորֆիրո Լոբոն մտադիր է «պահպանության պատվոգիր» տալ երկրում խռովության արդյունքում տապալված նախկին նախագահ Մանուել Սելայային, որպեսզի նա կարողանա մեկնել արտերկիր: Այդ մասին Լոբոն հայտարարել է Դոմինիկյան Հանրապետություն (ԴՀ) կատարած այցի ժամանակ: Նա հայտարարել է, թե համապատասխան փաստաթուղթը Սելայայի օգտին նա կստորագրի հունվարի 27-ին կայանալիք իր երդմնակալության արարողությունից անմիջապես հետո: Այդպիսի փաստաթուղթ ունենալուց հետո Հոնդուրասի նախկին նախագահ Սելայան հնարավորություն կունենա «պատվավոր հյուրի» կարգավիճակով իր ընտանիքի եւ մերձավոր զինակիցների հետ այցելել ԴՀ կամ այնտեղ քաղաքական ապաստան խնդրել, ինչը նա չէր կարող անել երկրի դե-ֆակտո կառավարության օրոք:
Հոնդուրասի եւ Դոմինիկյան Հանրապետության նախագահները նախօրեին մի փաստաթուղթ էին ստորագրել, որում մասնավորապես ասված է, որ Հոնդուրասի ընտրված նախագահը «գլխավորելու է կառավարությունը, որը հարգելու է քաղաքացիների իրավունքներն ու ազատությունները եւ չի հետապնդելու նրանց իրենց քաղաքական, կրոնական եւ այլ համոզմունքների համար»:
