BBC-ի մատուցմամբ, Չինաստանը կտրականապես հերքել է Վաշինգտոնի հայտարարությունը, որով նա մեղադրել է պաշտոնական Պեկինին ինտերնետը գրաքննության ենթարկելու մեջ: Չինաստանի ԱԳՆ-ի հայտարարության համաձայն, ԱՄՆ-ի ղեկավարության բողոքները գրաքննության դեմ կարող են վնասել Չինաստանի եւ ԱՄՆ-ի երկկողմ հարաբերություններին: Չինաստանի դժգոհության համար առիթ էր հանդիսացել ԱՄՆ պետքարտուղար Հիլարի Քլինթոնի հայտարարությունը, որտեղ վերջինս Չինաստանի իշխանություններին կոչ էր արել հետաքննել այդ երկրի կողմից Google-ի դեմ վերջերս տեղի ունեցող կիբերհարձակումների փաստերը, որոնք ստիպել էին ընկերությանը բարձրաձայնել չինական շուկան լքելու իր հնարավոր որոշման մասին:
Քլինթոնը մի շարք երկրների, այդ թվում՝ Չինաստանին, մեղադրել էր նաեւ գրաքննությունը խրախուսելու համար: Ի պատասխան, Չինաստանի ԱԳՆ ներկայացուցիչ Մա Չժաո Սյույը շեշտել է, թե նման զարգացումները կարող են վնասել երկկողմ կապերին, մինչդեռ Վաշինգտոնի եւ Պեկինի հարաբերություններն առանց այդ էլ լարված են առեւտրական դիսբալանսի, արժույթների փոխարժեքների եւ Թայվանին ամերիկյան զենք մատակարարելու խնդիրների պատճառով:
