Սբ. Վալենտինի օրը հորինել են գործարարները՝ փորձելով դրա միջոցով ավելացնել սրտերի տեսքով տարբեր հուշանվերների վաճառքները: Ըստ tert.am-ի՝ երեկ «Հայելի» ակումբում այս մասին ասել է տեր Հակոբ քահանա Խաչատրյանը: Ըստ նրա՝ կաթողիկ եկեղեցում կա Վալենտին անունով երեք սուրբ, սակայն նրանցից ոչ մեկի կենսագրությունը չի համապատասխանում Սբ. Վալենտինի կենսագրականին, հետեւաբար գոյություն չունի այն Սբ. Վալենտինը, որի պատվին նշվում է տոնը: Քահանան ասել է նաեւ, որ վերջին ժամանակներում երիտասարդներն ավելի քիչ են նշում այդ տոնը, չէ՞ որ Հայաստանում գոյություն ունի սիրահարների մեր՝ Սբ. Սարգսի տոնը: Իսկ ազգագրագետ Ռուզան Ծատուրյանը, չհամաձայնելով քահանայի հնչեցրած կարծիքին, ասել է. «Ես չեմ նկատում, որ քիչ են նշում, պարզապես Սբ. Սարգսի տոնն են սկսել ավելի շատ նշել»: Ազգագրագետը նաեւ ասել է, որ ոչ մի վատ բան չի տեսնում նրանում, որ երիտասարդները սիրահարների եւս մեկ տոն են նշում: