![\"\"](\"https://www.aravot.am/2010/aravot_arm/March/3/p15.jpg\")
ԱՄՆ-ն պատրաստ է օգնել Մեծ Բրիտանիային եւ Արգենտինային՝ Ֆոլկլենդի կղզիների շուրջ վեճը լուծելու համար: Այս մասին, BBC-ի մատուցմամբ, հայտարարել է ԱՄՆ պետքարտուղար Հիլարի Քլինթոնը՝ Լատինական Ամերիկա կատարած իր այցի ժամանակ: Ավելի վաղ Վաշինգտոնը հայտարարել էր, թե այդ հարցում Լոնդոնին չի աջակցելու:
Միացյալ Նահանգների արտաքին քաղաքականության գերատեսչության ղեկավարը շեշտել է, որ Լոնդոնը եւ Բուենոս Այրեսը պետք է փորձեն ինքնուրույն լուծել առկա խնդիրը, բայցեւ հավելել էր, որ «եթե մենք կարող ենք ինչ-որ կերպ օգնել դրան ուղղված ջանքերին, ապա մենք պատրաստ ենք: Մենք կուզենայինք, որ երկու պետությունների միջեւ տարաձայնությունները լուծվեին խաղաղ եւ արդյունավետ ճանապարհով, բայց մենք չենք կարող ստիպել դա անել կողմերից եւ ոչ մեկին»: Ֆոլկլենդի կղզիների շուրջ ծագած ճգնաժամը հաղթահարելու եւ Մեծ Բրիտանիայի հետ բանակցություններ սկսելու հարցում միջնորդի դեր ստանձնելու խնդրանքով ԱՄՆ պետքարտուղարին դիմել էր Արգենտինայի նախագահ Քրիստինա Ֆերնանդես դե Կիրշները: Վերջինս հայտարարել է, թե իր երկիրը համաձայն է ՄԱԿ-ի Գլխավոր ասամբլեայի եւ ապագաղութացման հատուկ կոմիտեի ընդունած այն տասնյակ բանաձեւերի հետ, որոնք կոչ են անում Մեծ Բրիտանիային վերսկսել բանակցություններն Արգենտինայի հետ եւ տարածքային վեճում գտնել «խաղաղ, արդար եւ վերջնական լուծում»:
