Ռիեկայում շարունակվում են շախմատի Եվրոպայի տղամարդկանց եւ կանանց անհատական առաջնությունները:
Հայաստանցի շախմատասերներին շարունակում է ուրախացնել կանանց միջազգային գրոսմայստեր Լիլիթ Գալոյանը: Վեցերորդ տուրում հայ շախմատիստուհին սեւ խաղաքարերով անչափ կարեւոր հաղթանակ տարավ Ուկրաինայի ներկայացուցիչ Աննա Ուշենինայի նկատմամբ եւ 5,0 միավորով բաժանում է 2-4-րդ տեղերը:
Մրցաշարային աղյուսակի համեմատաբար բարձր տեղերում ընթացող մեր աղջիկներից Էլինա Դանիելյանն ու Լիլիթ Մկրտչյանը բավարարվեցին ոչ-ոքիներով եւ 3,5-ական միավորով, համապատասխանաբար, 53-րդ եւ 62-րդ տեղերում են: Նրանք ամենայն հավանականությամբ արդեն մրցանակային տեղերի համար չեն պայքարի: Ինչ վերաբերում է Լիլիթ Գալոյանին, նա երեկ սպիտակներով խաղալու էր միանձնյա առաջատար, իր անվան դիմաց 5,5 միավոր գրանցած գրոսմայստեր Մոնիկա Սոչկոյի (Լեհաստան) հետ:
Տղաների մրցապայքարում դիրքերն սկսել է բարելավել գրոսմայստեր Վլադիմիր Հակոբյանը, որն իր թիմակիցներից միակն էր, որ վեցերորդ տուրում հաղթական միավոր վաստակեց՝ պարտության մատնելով շվեյցարացի Յաննիկ Պելետյեին: Այժմ Հակոբյանը 4,5 միավորով բարձրացել է 26-րդ հորիզոնական եւ մնացած տուրերում հաջողությունը զարգացնելու դեպքում մրցանակային տեղի հավակնելու հնարավորություն ունի, քանի որ առաջատարներ, ուկրաինացի Զախար Եֆիմենկոյին եւ վրացի Բաադուր Ջոբավային զիջում է ընդամենը մեկ միավոր: Երեկ Վլադիմիր Հակոբյանը սպիտակներով խաղում էր ռուսաստանցի գրոսմայստեր Սանան Սյուգիրովի հետ:
