ԱՐՄԵՆ ՇԵԿՈՅԱՆ

ՀԱՅԿԱԿԱՆ ԺԱՄԱՆԱԿ

Գլուխ երկրորդ

ՈՒՐԻՇԻ ՆԱՄԱԿՆԵՐ
Եվ ես Նինային համբուրելով ասացի՝ «դու սաղ գիշեր խռմփացնում էիր, բայց ես ոչ մի վայրկյան չեմ քնել», եւ Նինան ինձ համբուրելով ու ժպտալով ասաց՝ «շարունակում ես վիրավորել», եւ ես Նինային գրկելով ու կողքս պառկեցնելով ասացի՝ «մի քանի րոպեով աշխատանքային կենսագրությունդ փչացնենք», եւ Նինան ինձ համբուրելով ասաց՝ «սխալ ես փչացնում» եւ ծիծաղելով ավելացրեց՝ «փոխանակ շալվարս հանես, բլուզս ես հանել», եւ ես ծիծաղելով ասացի՝ «մեզ մոտ ինքնասպասարկում է», եւ Նինան ինձ համբուրելով ասաց՝ «էլի ես վիրավորում» եւ ժպտալով ավելացրեց՝ «բայց դրան էլ եմ համաձայն» եւ շալվարը հանելով ասաց՝ «մենակ թե՝ մի նեղացի», եւ ես արդեն մորեմերկ Նինային գրկելով ասացի՝ «առանձնապես նեղացկոտ չեմ», եւ Նինան ինձ համբուրելով ասաց՝ «արդեն քիթդ կախել էիր», եւ ես Նինային համբուրելով ասացի՝ «էդ անքնությունից ա», եւ Նինան ինձ համբուրելով հարցրեց՝ «այսինքն, չէիր նեղացե՞լ», եւ ես Նինային համբուրելով ասացի՝ «չէ», եւ Նինան ինձ համբուրելով ասաց՝ «փաստորեն, ինձ խաբեցիր» եւ ծիծաղելով ավելացրեց՝ «խաբեցիր՝ շալվարս հանել տվիր», եւ ես Նինային համբուրելով ասացի՝ «շալվարդ կամավոր ես հանել», եւ Նինան ինձ համբուրելով ասաց՝ «որովհետեւ մեզ մոտ ինքնասպասարկում է», եւ ես Նինային համբուրելով ասացի՝ «կամաց հռհռա. Սոկոլովը կլսի», եւ Նինան ինձ համբուրելով ասաց՝ «անաստվածն էնքան էլ շուտ ա զարթնում», եւ ես Նինային հարցրի՝ «ի՞նչ գիտես՝ շուտ ա զարթնում», եւ Նինան ինձ համբուրելով հարցրեց՝ «ձայները չե՞ս լսում», եւ ես Նինային համբուրելով հարցրի՝ «ի՞նչ ձայներ», եւ Նինան ինձ համբուրելով ասաց՝ «էդ անխիղճը ժամը յոթից մարզանքն սկսում ա. սենյակում համարյա կես ժամ վազվզում ա», եւ ես լսողությունս լարեցի, բայց ոչ մի ձայն չլսեցի, եւ Նինան ինձ համբուրելով հարցրեց՝ «չես լսո՞ւմ», եւ ես Նինային համբուրելով ասացի՝ «ոչ մի ձայն չկա», եւ Նինան զարմացած հարցրեց՝ «խուլ ե՞ս», եւ ես Նինային համբուրելով ասացի՝ «ոչ մի ձայն չկա», եւ Նինան ինձ համբուրելով ասաց՝ «հասկացա», եւ ես Նինային համբուրելով հարցրի՝ «ի՞նչ հասկացար», եւ Նինան ինձ համբուրելով ասաց՝ «էնքան ես ինձնով տարված, որ Սոկոլովի սմբակների ձայները չես լսում», եւ ես Նինային համբուրելով հայերեն ասացի՝ «տարոսը քեզ», եւ Նինան զարմացած հարցրեց՝ «էդ ի՞նչ ասացիր», եւ ես Նինային համբուրելով ասացի՝ «հեչ», եւ Նինան հարցրեց՝ «ո՞նց թե հեչ. կարող ա՞ էլի վիրավորեցիր», եւ ես Նինային համբուրելով ասացի՝ «անկախ ինձանից՝ հետդ հայերեն խոսեցի», եւ Նինան հարցրեց՝ «կարող ա՞ հայերեն հայհոյեցիր», եւ ես Նինային համբուրելով ասացի՝ «ոչ մի հայհոյանք չեմ տվել», եւ Նինան ինձ համբուրելով ասաց՝ «դե էդ նույնը ռուսերեն ասա», եւ ես Նինային համբուրելով ասացի՝ «էդ ասածս հնարավոր չի ռուսերեն թարգմանել», եւ Նինան ինձ համբուրելով ասաց՝ «ինչքան հնարավոր ա՝ էդքան թարգմանի», եւ ես Նինային ամուր գրկելով ու համբուրելով ասացի՝ «մինչեւ թարգմանեմ՝ աշխատանքից կուշանաս», եւ Նինան ինձ ամուր գրկելով ճչաց՝ «կորչի՛ աշխատանքը», եւ ես Նինային համբուրելով ասացի՝ «մի գոռա. Սոկոլովը կլսի», եւ Նինան ինձ ավելի ամուր գրկելով ճչաց՝ «Սոկոլովի մե՛րը», եւ ես Նինային համբուրելով ասացի՝ «արդեն դու էլ ես վիրավորում», եւ Նինան զարմացած հարցրեց՝ «ո՞ւմ եմ վիրավորում», եւ ես Նինային համբուրելով ասացի՝ «Սոկոլովին», եւ Նինան ինձ համբուրելով հարցրեց՝ «ասում ես՝ մեր հաշվով կասկածներ ունի՞», եւ ես Նինային համբուրելով ասացի՝ «ոչ թե կասկածներ ունի, այլ հարուր տոկոսով համոզված ա», եւ Նինան ինձ ամուր գրկելով ասաց՝ «իրա մե՛րը», եւ ես Նինային համբուրելով ասացի՝ «էսօր շատ կոպիտ ես», եւ Նինան քնքշորեն ինձ համբուրելով հարցրեց՝ «ո՞ւմ հանդեպ եմ կոպիտ», եւ ես ժպտալով պատասխանեցի ու ասացի՝ «Սոկոլովի» եւ համբուրելով ավելացրի՝ «էրեկ էս տեսակ կոպիտ բառեր չէիր ասում», եւ Նինան ինձ համբուրելով ասաց՝ «կամաց-կամաց բացվում եմ», եւ ես Նինային համբուրելով ասացի՝ «ծաղկի պես բացվել ես», եւ Նինան ինձ համբուրելով հարցրեց՝ «ինձ ո՞նց ես ավելի հավանում. էրեկվա վիճակո՞վ, թե՞ ըսենց բացված», եւ ես Նինային համբուրելով ասացի՝ «ըսենց լրիվ նորություն ա», եւ Նինան վերմակի տակ սուզվելով ասաց՝ «տղամարդիկ նորություն սիրում են» եւ ծիծաղելով ավելացրեց՝ «մանավանդ կովկասցիները», եւ ես վերմակի տակ Նինային գտնելով ասացի՝ «էրեւում ա՝ կովկասցիների հետ շատ ես շփվել», եւ Նինան վերմակը մեր վրայից շպրտելով ասաց՝ «որ մի բան ասեմ՝ երեւի չես հավատա», եւ ես Նինային համբուրելով ասացի՝ «կհավատամ», եւ Նինան ինձ սիրելով ասաց՝ «դու իմ կյանքում առաջին կովկասցին ես», եւ ես Նինային համբուրելով ասացի՝ «հուսով եմ՝ վերջինը կըլնեմ», եւ Նինան ինձ սիրելով ասաց՝ «շա՜տ էգոիստն ես», եւ ես Նինային սիրելով ասացի՝ «ճիշտ ես ասում», եւ Նինան ինձ սիրելով ասաց՝ «տարուց ավել ա՝ տղամարդու էրես չէի տեսել», եւ ես Նինային սիրելով հարցրի՝ «բայց հնարավորություն ունեցել ես, չէ՞», եւ Նինան ինձ սիրելով ասաց՝ «հնարավորություն միշտ էլ կա» եւ ինձ համբուրելով ավելացրեց՝ «մի քիչ էլ ցանկություն ա հարկավոր», եւ ես Նինային սիրելով ասացի՝ «ցանկությունդ լավ էլ տեղն ա», եւ Նինան ինձ սիրելով ասաց՝ «որ սկսում ես՝ ախորժակդ սկսում ա բացվել», եւ ես Նինային սիրելով ասացի՝ «շատ ուրախ եմ, որ հիմի ա ախորժակդ բացվում», եւ Նինան ինձ սիրելով ասաց՝ «հեռու հեռվից մեկին սիրում էի ու որոշել էի, որ չպիտի էդ մեկին դավաճանեմ», եւ ես Նինային հարցրի՝ «ի՞նչ մեկ», եւ Նինան ինձ սիրելով ասաց՝ «էդ մեկն էնքան հեռու ա գտնվում, որ արդեն անունն էլ եմ դժվարանում հիշել» եւ մի քիչ մտածեց ու ծիծաղելով ավելացրեց՝ «հիմա նույնիսկ քո անունը չեմ հիշում», եւ ես Նինային սիրելով ասացի՝ «որ հիշողությունդ մի քիչ լարես՝ կարող ա անունս հիշես», եւ Նինան ինձ սիրելով ասաց՝ «հեչ չեմ ուզում լարվեմ» եւ ինձ համբուրելով ավելացրեց՝ «որ լարվում եմ՝ չի ստացվում», եւ ես Նինային սիրելով հարցրի՝ «ի՞նչը չի ստացվում», եւ Նինան ինձ սիրելով ասաց՝ «անուններ հիշելը», եւ ես Նինային սիրելով ասացի՝ «անունները հեչ կարեւոր չեն», եւ Նինան ինձ սիրելով ասաց՝ «մարդիկ ավելի կարեւոր են, քան՝ անունները» եւ ինձ համբուրելով ավելացրեց՝ «մարդիկ իրարից ավելի տարբեր են, քան՝ անունները» եւ մի քիչ մտածեց ու ինձ սիրելով ավելացրեց՝ «բայց, մեծ հաշվով, բոլոր տղամարդիկ էլ նույնն են», եւ ես Նինային սիրելով ու ժպտալով ասացի՝ «մի լարվի, որ ստացվի», եւ Նինան ինձ սիրելով ասաց՝ «դիտմամբ եմ լարվում, որ էս հաճույքը երկարաձգեմ» եւ ինձ շատ ամուր գրկելով ճչաց՝ «աշխատանքային կենսագրությունս փչացրի՜ր», եւ ես ամբողջ ուժով Նինային գրկելով գոռացի՝ «միասի՜ն փչացրինք», եւ հենց էդ պահին դուռը ծեծեցին, եւ Նինան ժպտալով հարցրեց՝ «բացե՞մ», եւ ես ցնցվելով ասացի՝ «հանկարծ չբացես», եւ Նինան ժպտալով ասաց՝ «ինձ թվում ա՝ հիմա արդեն կարելի ա բացել», եւ ես ասացի՝ «լրիվ տկլոր ենք», եւ Նինան ծիծաղելով հարցրեց՝ «ինձնից չես ամաչում՝ էդ անասունից ե՞ս ամաչում», եւ ես Նինային համբուրելով հարցրի՝ «ի՞նչ անասուն», եւ Նինան ասաց՝ «սովորաբար էս ժամին Սոկոլովն ա դուռս ծեծում», եւ ես շշնջալով հարցրի՝ «կարող ա՞ վրեդ աչք ունի», եւ Նինան ծիծաղելով ասաց՝ «ծրարի ժամն ա», եւ ես շշնջալով ասացի՝ «մի գոռա. կլսի», եւ Նինան ծիծաղելով ասաց՝ «արդեն գնացել ա» եւ ծիծաղելով ավելացրեց՝ «չես լսո՞ւմ. արդեն սենյակում ա տռճիկ տալիս», եւ ես Նինային համբուրելով ասացի՝ «շատ ուժեղ լսողություն ունես. դու պիտի երաժիշտ դառնայիր», եւ Նինան ինձ համբուրելով ասաց՝ «դեռ կհասցնեմ. դեռ շատ ջահել եմ» եւ ինձ համբուրելով հարցրեց՝ «ինձ քանի՞ տարեկան կտաս», եւ ես Նինային համբուրելով ասացի՝ «քսանմեկ կամ ամենաշատը քսաներկու», եւ Նինան ինձ համբուրելով ասաց՝ «ապրես», եւ ես հարցրի՝ «ճիշտ գուշակեցի՞», եւ Նինան ինձ համբուրելով ասաց՝ «շատ ճիշտ կոմպլիմենտ արիր», եւ ես Նինային ասացի՝ «որ չիմանայի ինստիտուտն ավարտել ես, տասնութ տարեկանից ավել չէի տա», եւ Նինան տեղից վեր կենալով ու սրճեփը վերցնելով հարցրեց՝ «սուրճ խմելու ենք, չէ՞», եւ ես ասացի՝ «չի խանգարի», եւ Նինան սուրճը սրճեփի մեջ լցնելով ասաց՝ «փետրվարին քսանհինգս կլրանա», եւ ես ասացի՝ «տասնութ տարեկանի մարմին ունես», եւ Նինան շաքարավազը սրճեփի մեջ լցնելով հարցրեց՝ «տասնութ տարեկանի մարմին տեսել ե՞ս», եւ ես պատասխանեցի ու ասացի՝ «լիքը» եւ ծիծաղելով ավելացրի՝ «ամեն ամառ ծովափ եմ գնում», եւ Նինան ջուրը սրճեփի մեջ լցնելով հարցրեց՝ «էդ տասնութ տարեկանների մարմինները ծովափի՞ն ես տեսել, թե՝ անկողնում», եւ ես մի քիչ մտածեցի ու ասացի՝ «ծովափին», եւ Նինան ժպտալով ասաց՝ «էդ հասարակ հարցիս վրա մի ժամ մտածեցիր՝ նոր պատասխանեցիր», եւ ես մի քիչ մտածեցի ու ժպտալով ասացի՝ «որովհետեւ աղջիկների ու կանանց տարիքը հարցնելու սովորություն չունեմ», եւ Նինան ժպտալով հարցրեց՝ «բա իմ տարիքն ինչի՞ հարցրիր», եւ ես արդարանալով ասացի՝ «տարիքի հաշվով դու խոսակցություն բացեցիր», եւ Նինան մի քիչ մտածեց ու ասաց՝ «որ բացել եմ՝ շարունակեմ» եւ մի քիչ էլ մտածեց ու ժպտալով հարցրեց՝ «դո՞ւ ինչքան ես», եւ ես ժպտալով ասացի՝ «մարտին կդառնամ երեսուն», եւ Նինան մի քիչ մտածեց ու ժպտալով ասաց՝ «տասնութ տարեկանների համար ահագին բիձա ես», եւ ես ժպտալով ասացի՝ «ինձ քսանհինգ տարեկանների կարծիքն ավելի ա հետաքրքրում», եւ Նինան մի քիչ մտածեց ու ժպտալով ասաց՝ «առայժմ քսանչորս եմ», եւ ես ժպտալով ասացի՝ «ես էլ առայժմ քսանինն եմ», եւ Նինան մի քիչ մտածեց ու ծիծաղելով ասաց՝ «ընդամենը քսանինն ես, բայց քեզ շա՜տ ծանր ես պահում», եւ ես զարմացած հարցրի՝ «ո՞նց եմ ծանր պահում», եւ Նինան սուրճը բաժակների մեջ լցնելով ասաց՝ «պառկել սպասում ես, որ տեղաշորիդ մեջ սուրճդ մատուցեն», եւ ես մի քիչ մտածեցի ու արդարանալով ասացի՝ «որ իմ սենյակում ըլնեինք, ես կմատուցեի», եւ Նինան մի քիչ մտածեց ու ծիծաղելով ասաց՝ «քո նեղլիկ մահճակալին երկուսով դժվար թե տեղավորվեինք», եւ ես ժպտալով ասացի՝ «մարդու մտքին տեղ ըլնի», եւ Նինան մի քիչ մտածեց ու լրջանալով ասաց՝ «ինձ լրիվ բոզի տեղ ես դրել», եւ ես զարմացած հարցրի՝ «ինչի՞ց ենթադրեցիր», եւ Նինան աթոռը մահճակալին մոտեցնելով եւ սուրճերն աթոռին դնելով ասաց՝ «կարող ա՞ ուրիշների պես սրանրա սենյակներում քարշ գամ», եւ ես ժպտալով ասացի՝ «էսքան նեղություն որ քաշեցիր, սիգարետս ու վառիչս էլ բեր», եւ Նինան ինձ համբուրելով ասաց՝ «որ շատ խնդրես՝ կբերեմ», եւ ես Նինային համբուրելով ասացի՝ «շա՜տ եմ խնդրում», եւ Նինան սիգարետի տուփը, վառիչն ու մոխրամանն աթոռին դնելով ու կողքս տեղավորվելով ասաց՝ «կարելի՞ է ձեր սիգարետից օգտվել, ձերդ երեսնամյա մեծություն», եւ ես Նինայի սիգարետը վառելով ասացի՝ «չգիտեի, որ ծխում ես», եւ Նինան ծուխը ներքաշելով ասաց՝ «միանգամից ահագին բան իմացար» եւ մի քիչ մտածեց ու հարցրեց՝ «հետաքրքիր ա, չէ՞», եւ ես հարցրի՝ «ի՞նչն ա հետաքրքիր», եւ Նինան ինձ գրկելով ասաց՝ «օրուկես առաջ լրիվ օտար մարդիկ էինք, իսկ հիմա էնպիսի զգացողություն ունեմ՝ ասես հազար տարի իրար ճանաչել ենք», ու էդ պահին նորից դուռը թակեցին, եւ Նինան ասաց՝ «էլի էդ անասունն ա. արդեն զզվացնում ա», եւ ես հարցրի՝ «ի՞նչ գիտես, որ ինքն ա», եւ Նինան ինձ համբուրելով ասաց՝ «էս ժամին մենակ ինքն ա դուռս ծեծում» եւ մի քիչ մտածեց ու ավելացրեց՝ «երեւի ծրարն ա բերել» եւ մի քիչ էլ մտածեց ու ասաց՝ «հաստատ մի վեպի չափ գրած կըլնի», եւ ես հարցրի՝ «ո՞նց վեպի չափ», եւ Նինան ժպտալով ասաց՝ «արանքում որ կիրակի ա ընկնում, ինքը կրկնակի ա գրում», եւ ես հարցրի՝ «իրա էդ սաղ գրածները կարդում ե՞ս», եւ Նինան ինձ համբուրելով ասաց՝ «ուրիշների նամակները կարդալու սովորություն չունեմ», եւ ես հարցրի՝ «բա ի՞նչ գիտես, որ կրկնակի ա գրում», եւ Նինան ժպտալով ասաց՝ «ծրարի հաստությունից եմ զգում», եւ էդ պահին նորից դուռը թակեցին, եւ Նինան վրդովված ասաց՝ «չբացե՞նք՝ դրա մռութը ջարդենք», եւ ես ժպտալով հարցրի՝ «ըսենց տկլո՞ր», եւ Նինան մի քիչ մտածեց ու ծիծաղելով ասաց՝ «ինձնից չես ամաչում՝ էդ անասունից ե՞ս ամաչում», եւ ես ծիծաղելով ասացի՝ «քո համար եմ ամաչում. չեմ ուզում, որ քեզ ըսենց տկլոր տենա» եւ մի քիչ մտածեցի ու ծիծաղելով ավելացրի՝ «էդ իրա համար մի քիչ շատ կըլնի», եւ Նինան մի քիչ մտածեց ու ժպտալով ասաց՝ «ճիշտ ես ասում» եւ ուշադրությունը լարելով ավելացրեց՝ «արդեն վերջնական գնաց», եւ ես զարմացած հարցրի՝ «ո՞նց իմացար», եւ Նինան հանգստացած ասաց՝ «ոտնաձայները դեպի լիֆտն են գնում», եւ ես ծիծաղելով ասացի՝ «Սոկոլովի գծով լրիվ մասնագիտացել ես», եւ Նինան ժամացույցին նայելով ասաց՝ «ինքն ամեն առավոտ էս ժամին ա սիկտիրը քաշում» եւ ծիծաղելով ավելացրեց՝ «ժամացույցս էդ անասունի գնալով եմ ուղղում», եւ ես ժամացույցին նայելով հարցրի՝ «ամեն օր էսքան շուտ ա՞ դասի գնում», եւ Նինան ժպտալով ասաց՝ «էսօր հինգ րոպե ուշ գնաց» եւ մի քիչ մտածեց ու ավելացրեց՝ «դուռը չբացեցի, դրա համար էլ ոտը մի քիչ կախ գցեց» եւ մի քիչ էլ մտածեց ու ավելացրեց՝ «չհաջողացրեց էդ հանապազօրյա ծրարն ինձ տալ» եւ մի քիչ էլ մտածեց ու ծիծաղելով ասաց՝ «էնպես որ՝ ճիշտ ես ասում», եւ ես հարցրի՝ «ի՞նչն եմ ճիշտ ասում», եւ Նինան ժպտալով ասաց՝ «էդ անասունի գծով լրիվ մասնագիտացել եմ», եւ ես ժպտալով ասացի՝ «բայց ահագին հետ ես մնացել», եւ Նինան զարմացած հարցրեց՝ «ինչի՞ց եմ հետ մնացել», եւ ես ժպտալով պատասխանեցի ու ասացի՝ «կյանքից» եւ մի քիչ մտածեցի ու ժպտալով ավելացրի՝ «կյանքից, ժամանակից ու Սոկոլովից», եւ Նինան մի քիչ մտածեց ու ասաց՝ «չհասկացա», եւ ես ժպտալով ասացի՝ «որ բացատրեմ՝ կհասկանաս», եւ Նինան հարցրեց՝ «ի՞նչ կհասկանամ», եւ ես ժպտալով ասացի՝ «կհասկանաս, որ Սոկոլովն էսօր քեզ ոչ մի ծրար էլ չէր տալու», եւ Նինան զարմացած հարցրեց՝ «բա խի՞ էր դուռը ծեծում», եւ ես մի քիչ մտածեցի ու ասացի՝ «երեւի ուզում էր ճշտեր», եւ Նինան հարցրեց՝ «ի՞նչը ճշտեր», եւ ես ասացի՝ «ուզում էր ճշտեր՝ մենք իրար հե՞տ ենք, թե՝ չէ», եւ Նինան ասաց՝ «բա ասում ես՝ արդեն գլխի ա ընկել», եւ ես ասացի՝ «երեւի ուզում ա վերջնականապես ճշտի», եւ Նինան մի քիչ մտածեց ու ասաց՝ «համ կճշտեր, համ էլ ծրարը կտար», եւ ես ժպտալով ասացի՝ «ոչ մի ծրար էլ չէր տալու», եւ Նինան բավական երկար մտածեց ու ասաց՝ «որ մի բան ասեմ, էլ չես ասի, որ կյանքից ու ժամանակից հետ եմ մնացել», եւ ես ժպտալով ասացի՝ «ասա», եւ Նինան ասաց՝ «ճիշտն ասած, իմ մտքով էլ էր անցել, որ էդ անասունն էս օրերին ինձ ծրար չի տա», եւ ես հարցրի՝ «ինչի՞ չպիտի տար», եւ Նինան ասաց՝ «որովհետեւ Սանյան էստեղ չի» եւ ինքնագոհ ժպտալով ավելացրեց՝ «էդ զրպարտագրերի հիմնական թեման Ռոդիոնովն ա», եւ ես ժպտալով ասացի՝ «բա ասում ես՝ ուրիշների նամակները չես կարդում», եւ Նինան ասաց՝ «սկզբնական շրջանում կարդում էի» եւ մի քիչ մտածեց ու ավելացրեց՝ «սկզբնական շրջանում ռեկտորն էլ էր կարդում. Պիմենովը կարդում ու փոխանցում էր ինձ», եւ ես ժպտալով ասացի՝ «պարզվում ա՝ կյանքից ու ժամանակից էնքան էլ հետ չես մնացել», եւ Նինան ինքնագոհ ժպտալով ասաց՝ «էնպես որ, հենց Սանյան վերադառնա, էդ անասունն էլի կսկսի գրել», եւ ես ժպտալով ասացի՝ «ոչ մի բան էլ չի գրի», եւ Նինան ասաց՝ «ասում եմ՝ Սանյայի վերադառնալուց հետո», եւ ես ժպտալով ասացի՝ «Սանյայի վերադառնալուց հետո էլ չի գրի», եւ Նինան ժպտալով ասաց՝ «երեսուն տարեկան ես, բայց շա՜տ ռոմանտիկ ես», եւ ես ժպտալով ասացի՝ «երեսունս մարտին ա լրանալու», եւ Նինան ժպտալով ասաց՝ «քսանինն ես, բայց հրաշքների ես հավատում», եւ ես ժպտալով ասացի՝ «ընդամենը քսանհինգ տարեկան ես, բայց արդեն հրաշքների չես հավատում», եւ Նինան ասաց՝ «առայժմ քսանչորս եմ», եւ ես ժպտալով ասացի «ընդամենը քսանչորս տարեկան ես, բայց մարդկանց հանդեպ հավատդ լրիվ կորցրել ես», եւ Նինան զարմացած նայեց ինձ ու ասաց՝ «էդ անասունին մարդ ե՞ս համարում» եւ մի քիչ մտածեց ու ավելացրեց՝ «տարիքով մարդ ես, բայց ձեր կուրսի ավագին հեչ չես ճանաչում», եւ ես ժպտալով ասացի՝ «նոր եմ սկսել ճանաչել», եւ Նինան քամահրանքով հարցրեց՝ «երբվանի՞ց ես սկսել էդ անասունին ճանաչել», եւ ես ասացի՝ «երեկվանից», եւ Նինան սրճեփի տակ մնացած սուրճը մեր բաժակների մեջ լցնելով ասաց՝ «էդ տականքից պիտի շատ զգուշանաս» եւ մի քիչ մտածեց ու հարցրեց՝ «իրիկունն ի՞նչ էր հետդ ժամերով խոսում», եւ ես ժպտալով ասացի՝ «ասում էր, որ Սանյայի պատմվածքը շատ ա հավանել», եւ Նինան մի քիչ մտածեց ու ասաց՝ «չհավատալու բան ես ասում», եւ ես ժպտալով ասացի՝ «հավատա», եւ Նինան մի քիչ մտածեց ու հարցրեց՝ «անկեղծ է՞ր ասում», եւ ես ժպտալով պատասխանեցի ու ասացի՝ «միանգամայն», եւ Նինան մի քիչ մտածեց ու ասաց՝ «երեւի քեզ ա ուզեցել փորձի», եւ ես ծիծաղելով ասացի՝ «երեսուն տարեկան մարդ եմ. կեղծն ու անկեղծն իրարից տարբերում եմ», եւ Նինան մի քիչ մտածեց ու ասաց՝ «հնարավոր ա» եւ մի քիչ էլ մտածեց ու ավելացրեց՝ «էդ անհամությունը հազիվ էլ Սոկոլովը հավաներ», եւ ես հարցրի՝ «կարդացե՞լ ես», եւ Նինան հարցրեց՝ «էդ «Լիտգազետայի» տպա՞ծը», եւ ես ասացի՝ «հա», եւ Նինան մի քիչ մտածեց ու ասաց՝ «էնտեղ կարդալու բան չկար. ծերից ծեր ջուր էր» եւ մի քիչ էլ մտածեց ու ասաց՝ «զարմանալի ա», եւ ես հարցրի՝ «ի՞նչն ա զարմանալի», եւ Նինան մի քիչ մտածեց ու ասաց՝ «զարմանալի ա, որ էդքան կոլորիտով մարդը կարա էդքան անհամ բան գրի», եւ ես ժպտալով ասացի՝ «ընդամենը քսանչորս տարեկան ես, բայց շատ լուրջ ու շատ խիստ ես քննադատում», եւ Նինան մի քիչ մտածեց ու ասաց՝ «քսանչորս տարեկան եմ, բայց էս ինստիտուտը ձեզանից շուտ եմ ավարտել» եւ մի քիչ էլ մտածեց ու քամահրանքով հարցրեց՝ «թե՞ մտածում ես՝ քարտուղարուհի եմ ծնվել», եւ ես ժպտալով ասացի՝ «քարտուղարուհի չեն ծնվում՝ դառնում են», եւ Նինան մի քիչ մտածեց ու ասաց՝ «ինձ մոտ ինչ-որ չի ստացվում» եւ մի քիչ էլ մտածեց ու ավելացրեց՝ «երեւի, այնուամենայնիվ, ծնվում են», եւ ես ժպտալով ասացի՝ «դու քարտուղարուհի չես ծնվել», եւ Նինան ժպտալով ասաց՝ «դրա համար էլ հասկացել եմ, որ Սանյայի էդ պատմվածքը հեչ բան ա» եւ մի քիչ մտածեց ու ծիծաղելով ավելացրեց՝ «դրա համար էլ Սոկոլովը հավանել ա», եւ ես ասացի՝ «Կլիմն ու Դիման չեն հավանել», եւ Նինան մի քիչ մտածեց ու ասաց՝ «էնտեղ հավանելու կամ չհավանելու բան չկար», եւ ես ասացի՝ «Անդրյուշան էլ էր հավանել», եւ Նինան մի քիչ մտածեց ու ասաց՝ «Անդրյուշան Սանյայի ստրուկն ա. ինքը Սանյայի համար արաղ առնելը մեծ պատիվ ա համարում», եւ ես ասացի՝ «Անդրյուշան շատ մաքուր մարդ ա», եւ Նինան մի քիչ մտածեց ու ժպտալով ասաց՝ «ոչ թե մաքուր մարդ ա, այլ՝ մաքուր ստրուկ» եւ մի քիչ էլ մտածեց ու ավելացրեց՝ «Անդրյուշի համար Սանյան կուռքի պես բան ա», եւ ես մի քիչ մտածեցի ու ասացի՝ «բայց Սոկոլովի համար Սանյան կուռք չի», եւ Նինան մի քիչ մտածեց ու ծիծաղելով ասաց՝ «նույնիսկ էդ անասունի մատնագրերն են Սանյայի էդ պատմվածքից հետաքրքիր», եւ ես հարցրի՝ «էդ մատնագրերից քանի՞ հատ ես կարդացել», եւ Նինան մի քիչ մտածեց ու ասաց՝ «չորս կամ հինգ» եւ ծիծաղելով ավելացրեց՝ «բոլորն էլ Սանյայի էդ պատմվածքից հետաքրքիր էին», եւ ես ասացի՝ «որ Սանյան գա՝ իրան ասելու եմ», եւ Նինան վախեցած հարցրեց՝ «ի՞նչ ես ասելու», եւ ես ժպտալով ասացի՝ «ասելու եմ, որ Սոկոլովն իրա էդ պատմվածքը շատ ա հավանել», եւ Նինան մի քիչ մտածեց ու ժպտալով ասաց՝ «որ ասես՝ միանգամից կախպերանան», եւ ես հարցրի՝ «լուրջ ե՞ս ասում», եւ Նինան ծիծաղելով պատասխանեց ու ասաց՝ «կարաս չկասկածես», եւ Նինան հարցրեց՝ «մի հատ էլ սուրճ չդնե՞մ», եւ ես ասացի՝ «էս մեկից բան չհասկացանք» եւ ժպտալով ավելացրի՝ «մենակ թե՝ չնեղանաս», եւ Նինան զարմացած հարցրեց՝ «ինչի՞ց պիտի նեղանամ», եւ ես ժպտալով ասացի՝ «օրենքով՝ ե՛ս պիտի տեղաշորի մեջ քեզ սուրճ մատուցեի», եւ Նինան տեղից վեր կենալով հարցրեց՝ «ո՞ր օրենքով», եւ ես պատասխանեցի ու ասացի՝ «ջենտլմենության օրենքով», եւ Նինան ժպտալով ասաց՝ «կովկասցիք ու ջենտլմենությունն իրարից շատ տարբեր բաներ են», եւ ես ժպտալով ասացի՝ «բա նոր ասում էիր՝ առաջին անգամ ես կովկասցու հետ էսքան մոտիկից շփվում», եւ Նինան ծիծաղելով ասաց՝ «էս մի անգամը լրիվ հերիք էր, որ պատկերացում կազմեի», եւ ես ժպտալով հարցրի՝ «ի՞նչ պատկերացում կազմեցիր», եւ Նինան մի քիչ մտածեց ու լրջանալով ասաց՝ «վերջնականապես համոզվեցի, որ դուք մեզ բոզի տեղ եք դնում», եւ ես զարմացած հարցրի՝ «ո՞ւմ ենք բոզի տեղ դնում», եւ Նինան պատասխանեց ու ասաց՝ «ռուս աղջկերքին» եւ մի քիչ մտածեց ու ավելացրեց՝ «առաջ որ ասում էին՝ չէի հավատում», եւ ես հարցրի՝ «հիմի հավատո՞ւմ ես», եւ Նինան ծիծաղելով պատասխանեց ու ասաց՝ «իհարկե հավատում եմ», եւ ես հարցրի՝ «բա խի՞ ես ծիծաղում», եւ Նինան սուրճը բաժակների մեջ լցնելով ասաց՝ «իմ վրա եմ ծիծաղում» եւ մի քիչ մտածեց ու ավելացրեց՝ «մտածում եմ՝ խի՞ ենք էսքան ապուշ», եւ ես զարմացած հարցրի՝ «խի՞ եք ապուշ», եւ Նինան մի քիչ մտածեց ու սրտնեղած ասաց՝ «իզուր տեղը քո առաջ սիրտս բացեցի ու կյանքս պատմեցի», եւ ես զարմացած հարցրի՝ «ե՞րբ ես կյանքդ պատմել», եւ Նինան թախծոտ ժպտալով ասաց՝ «էրեկ ամբողջ օրն Օստանկինոյի խոտերի վրա ի՞նչ էի անում» եւ մի քիչ մտածեց ու ավելացրեց՝ «կյանքս ծերից ծեր պատմեցի», եւ ես ժպտալով ասացի՝ «համարյա բան չես պատմել», եւ Նինան մի քիչ մտածեց ու սրտնեղած ասաց՝ «էդքանն էլ էր շատ», եւ ես մի քիչ մտածեցի ու ասացի՝ «բայց մեր հարաբերությունները Օստանկինոյից առաջ արդեն սկսվել էին», եւ Նինան մի քիչ մտածեց ու ասաց՝ «Օստանկինոյից ահագին առաջ» եւ մի քիչ էլ մտածեց ու ժպտալով ավելացրեց՝ «ամեն ինչ նախ մարդու հոգու մեջ ա տեղի ունենում, հետո նոր՝ տեղաշորի մեջ»:
Շարունակությունը՝ հաջորդ շաբաթ