ՀՀ ԿԳ նախարարությունում մարտի 29-ին տեղի է ունեցել նախարարի հրամանով ձեւավորված հատուկ հանրակրթական ուսումնական հաստատություններում մշտադիտարկում իրականացնող հասարակական խորհրդի անդրանիկ նիստը, որը վարում էր նախարար Արմեն Աշոտյանը: Վերոնշյալ խորհուրդը ստեղծվել է քաղաքացիական հասարակության կառույցների առաջարկով: «Յուրաքանչյուր երեխայի եւ յուրաքանչյուր դպրոցի խնդիրը պետք է լինի բոլորիս սեփականությունը, եւ ծագած յուրաքանչյուր հարց ու խնդիր պետք է լուծենք միասին: Մեր հարաբերությունները պետք է լինեն գործընկերային, եւ պետք է բացառել «ստուգող եւ ստուգվող» մոտեցումները»,- ըստ edu.am-ի, նշել է ԿԳ նախարարը եւ հավելել, որ խորհրդի կազմում ընտրվել են բոլոր այն հ/կ-ները, որոնք իրականացնում են կրթական ծրագրեր եւ աշխատանքներում ներգրավվելու հայտ են ներկայացրել:
Քննարկման արդյունքում որոշվեց 10-օրյա ժամկետում ընտրել խորհրդի նախագահ, տեղակալ, քարտուղար ու մեկամսյա ժամկետում հաստատել մշտադիտարկում իրականացնող հասարակական խորհրդի կազմը:
Պայմանավորվածություն ձեռք բերվեց հասարակական խորհրդի անդամների վերաբերյալ տեղեկություններն ուղարկել մշտադիտարկման ենթակա բոլոր դպրոցներին, որպեսզի արդյունավետ համագործակցության համար ստեղծվեն բոլոր հիմքերը: Ի դեպ, հասարակական խորհրդի անդամների համար կկազմակերպվեն նաեւ վերապատրաստման համապատասխան դասընթացներ:
