ՀՖՖ մամուլի քարտուղարությունը տեղեկացնում է, որ Եվրոպայի 2011 թվականի առաջնության ընտրական մրցաշարի «B» խմբի խաղացանկում փոփոխություններ են կատարվել: Ըստ աղբյուրի, Հայաստանի ֆուտբոլի ֆեդերացիան եւ Ռուսաստանի ֆուտբոլային միությունը պայմանավորվել են փոխատեղել իրենց ազգային հավաքականների միջեւ կայանալիք հանդիպումների վայրերը: Այսպիսով, Հայաստանի ազգային հավաքականը եկող տարվա մարտի 26-ին կընդունի Ռուսաստանի ընտրանուն, որից հետո հունիսի 14-ին ինքը կհյուրընկալվի մրցակցին: Այս տարբերակը, որքան հիշում ենք, մեր թիմի գլխավոր մարզիչ Վարդան Մինասյանի սրտով է. նա խմբի խաղացանկի հայկական կողմի տարբերակի մշակման ժամանակ ցանկություն էր հայտնել, որպեսզի ընտրական մրցաշարում Հայաստանը ռուսների հետ առաջին հանդիպումն անցկացնի սեփական հարկի տակ: