Գերմիջին քաշային կարգում WBC-ի վարկածով աշխարհի նախկին չեմպիոն, բրիտանացի Կարլ Ֆրոչը հերթական պահանջն է ներկայացրել: Նա հիմա էլ առաջարկում է «Super Six»-ի շրջանակներում Արթուր Աբրահամի հետ կայանալիք մարտն անցկացնել Ամերիկայում: Հիշեցնենք, որ բռնցքամարտիկները ընդհանուր հայտարարի չեն գալիս Անգլիայում կամ Գերմանիայում ռինգ մտնելու հարցում, որին որպես այլընտրանքային տարբերակ առաջարկվել էր Շվեդիան:
«Fightnews.ru»-ն տեղեկացնում է, որ Ֆրոչի վերջին առաջարկն անընդունելի է Աբրահամի թիմի համար, քանի որ երկու եվրոպացիների մենամարտն օվկիանոսից այն կողմում դժվար թե ամերիկացի մարզասերների շրջանում պահանջվող հետաքրքրության արժանանա:
«Ես ֆինանսական եւ իրավական պարտավորություններ ունեմ «Showtime»-ի հետ եւ չեմ կարող գործից դուրս գալ, եթե, իհարկե, չորոշեմ կարիերաս ավարտել: Դրա համար էլ մենամարտը պետք է կայանա չեզոք երկրում: Դա կարող է Ամերիկան լինել: Ես չեմ ցանկանում հանդես գալ Գերմանիայում, Շվեդիայում կամ Նոթինգհեմից արեւելք գտնվող մեկ այլ վայրում, քանի որ այնտեղ չեմ կարողանա միավորներով հաղթանակ տանել»,- լրատվամիջոցներին հայտարարել է Կարլ Ֆրոչը:
