![\"\"](\"https://www.aravot.am/2010/aravot_arm/May/26/p16.jpg\")
«Աշխարհի կենտրոն»: Նման հավակնոտ վերնագրով օտարալեզու գունավոր պաստառ կարելի է տեսնել Տավուշի մարզի ամենամեծ գյուղական համայնքի` սահմանամերձ Կողբի «Ավագի ձոր» թաղամասում, միջպետական ճանապարհի կողքին: Այստեղ «Առաքելություն մանկություն» ֆրանսիական բարեգործական կազմակերպությունը մանուկների եւ երիտասարդների համար ժամանցի եւ ակտիվ հանգստի կենտրոն է կառուցում: Այն հագեցած կլինի տարբեր խաղամիջոցներով, նաեւ բարձրաճաշակ եւ բարձրորակ ֆիլմերի ցուցադրումներ կլինեն: Նույն կազմակերպությունը Կողբի թիվ 2 մսուր-մանկապարտեզում կառուցում է «Արհեստի եւ արվեստի դպրոց»: Անգործության մատնված շենքը հիմնանորոգվում է, կառուցվում է երկրորդ հարկ: Այն երիտասարդներն ու աղջիկները, ովքեր դպրոցն ավարտելուց հետո հնարավորություն չեն ունեցել ուսանող դառնալու, այստեղ մասնագիտություն ձեռք կբերեն:
Առաջին հարկում կուսուցանվեն տարբեր արհեստներ` ձեռագործություն, փայտագործություն, ոսկերչություն, ճաշասեղանների դիզայն եւ այլն, երկրորդ հարկում էլ գեղարվեստ կուսուցանվի: «Առաքելություն մանկություն» կազմակերպության ղեկավար Ռաֆֆի Քամալյանի խոսքերով՝ «Արհեստի եւ արվեստի դպրոցը» կգործարկվի այս տարվա սեպտեմբերին:
