Գիտատեխնիկական խորհրդի երեկ հրավիրված անդրանիկ նիստում, որը վարել է Հայաստանի վարչապետ, խորհրդի նախագահ Տիգրան Սարգսյանը, քննարկվել են խորհրդի աշխատանքի սխեմային վերաբերող, ինչպես նաեւ մինչեւ տարեվերջ խորհրդի նիստերի օրակարգում ընդգրկվելիք ոլորտների եւ դրանց համակարգողների վերաբերյալ առաջարկները: Նշվել է, որ գիտատեխնիկական խորհուրդն իր գործառույթները կիրականացնի Հայաստանի տնտեսության եւ գիտության բնագավառներում: Խորհրդում քննարկվելիք նախագծերը այնուհետեւ կներկայացվեն գիտական եւ ֆինանսատնտեսական փորձաքննության: Ըստ ՀՀ կառավարության Տեղեկատվության եւ հասարակայնության հետ կապերի վարչության հաղորդագրության, նիստում հաստատվել է նաեւ խորհրդի 2010 թվականի աշխատանքի ժամանակացույցը: