Կիրակի օրը Կապանում, երեկոյան ժամը 20.30-ի սահմաններում, ծեծկռտուք ստեղծած երեք երիտասարդները ձերբակալվել են եւ այժմ գտնվում են Գորիսի բանտում: Տեղեկացնենք, որ կիրակի օրը՝ նոյեմբերի 7-ին, Կարեն Դեմիրճյանի հրապարակում միջին աստիճանի խմածության վիճակում գտնվող կապանցի երիտասարդներ Զոհրաբ Ավանեսյանը, Միհրան Հայրապետյանը եւ Գրիգոր Փարսյանը բարձր հայհոյանքներ են տեղացել փողոցում: Նրանց փորձել են կարգի հրավիրել պարեկապահակային ծառայության աշխատակիցները, սակայն երիտասարդների ցուցաբերած դիմադրությունից հետո դեպքի վայր են ժամանել ոստիկանները: Տեղի է ունեցել ծեծկռտուք, որի ժամանակ մարմնական վնասվածքներ է ստացել Սյունիքի մարզի քննչական բաժնի հետաքննիչ Զորիկ Վարդանյանը: Անսթափ վիճակում գտնվող երիտասարդներին բերման են ենթարկել մարզի քննչական բաժանմունք: Նրանց նկատմամբ առաջադրվել է քրեական մեղադրանք՝ քր. օրենսգրքի 316 հոդվածի 3-րդ մասի առաջին երկու կետերով՝ իշխանության ներկայացուցիչների նկատմամբ բռնություն կիրառելու եւ 258-րդ հոդվածով՝ խուլիգանության մեղադրանքով:
Նոյեմբերի 9-ին քննչական բաժինը կալանավորելու միջնորդություն է ներկայացրել Սյունիքի մարզի ընդհանուր իրավասության դատարան: Դատարանը բավարարել է միջնորդությունը եւ խափանման միջոց ընդունել կալանքը: Ի դեպ, դատարանում երիտասարդներն ընդունել են իրենց մեղավորությունը:
