Այսօր՝ ապրիլի 9-ին ավտովթար է տեղի ունեցել Աշտարակ–Երևան ավտոճանապարհի Քասախ գյուղի սկզբնամասում։ Ինչպես դեպքի վայրից Aravot.am-ին տեղեկացնում է ֆոտոլրագրող Գագիկ Շամշյանը, ժամը 06։30-ի սահմաններում «Մերսեդես» մակնիշի 19 ՍԼ 381 պետհամարանիշի ավտոմեքենան դուրս է եկել ճանապարհի երթևեկելի գոտուց, հարվածել մայթեզրի բետոնե արգելապատնեշներին, որից հետո բախվել էլեկտրասյանը։
Բախման հետևանքով էլեկտրասյունը պոկվել և մոտ 5 մետր շպրտվել է։ Հարվածի արդյունքում մոտ 60 մետր էլ շպրտվել է ավտոմեքենայից պոկված գազի բալոնը։
Վթարի հետևանքով մարմնական վնասվածքներով «Արմենիա» բժշկական կենտրոն են տեղափոխվել վարորդը և ուղևորը։
Այս պահին դեպքի վայր են ժամանել Ճանապարհային ոստիկանության 2–րդ սպայական գումարտակի 3-րդ վաշտի 1-ին դասակի աշխատակիցները՝ հրամանատար Արսեն Գրիգորյանի գլխավորությամբ։ Տեղում է նաև Ոստիկանության Նաիրիի բաժնի օպերատիվ քննչական խումբը։
Կարդացեք նաև
Փաստի առթիվ Ոստիկանության քննչական գլխավոր վարչության Կոտայքի մարզի քննչական բաժնի Նաիրի քննչական բաժանմունքի ավագ քննիչ Հայկ Հակոբյանի կողմից նյութեր են նախապատրաստվում։
Հիվանդանոց մեկնած ավագ քննիչ Հ. Հակոբյանը պարզել է, որ հիվանդանոց տեղափոխված անձինք Երևան քաղաքի բնակիչ 29-ամյա Հովհաննես Մկրտչյանը և Վանաձորի բնակիչ 30-ամյա Խաչատուր Սարդարյանն են։
Լուսանկարները՝ Գագիկ ՇԱՄՇՅԱՆԻ
