Տավուշի մարզի թիվ 40 ընտրատարածքից Աժ պատգամավորի թեկնածու, Նոյեմբերյանի ավագանու անդամ, փոքր ձեռնարկության սեփականատեր Վարուժան Բաբաջանյանը դեռեւս մարտի 28-ին Ֆեյսբուքի «Ազատ Տավուշ» խմբում հայտարարություն է տեղադրել, որը վերնագրել է «Մեր պատասխանը Չեմբերլենին կամ հեռուստաբանավեճի առաջարկ», որտեղ առաջարկել է. «Թեկնածուներից ամենաարժանավորին ընտրելու համար ես առաջարկում եմ հիանալի տարբերակ. քարոզարշավի ընթացքում անցկացնել քաղաքական բանավեճ ուղիղ եթերում, մեկը քարոզարշավի առաջին օրը, մյուսը` վերջին: Թող հասարակությունը բանավեճի արդյունքներով կողմնորոշվի, թե ով է ավելի արժանի պատգամավոր դառնալու համար: Սա պաշտոնական առաջարկ է, սպասում ենք համարժեք պատասխանի»: Թիվ 40 ընտրատարածքում (այն ընդգրկում է Նոյեմբերյանի տարածաշրջանի 19, Իջեւանի տարածաշրջանի ՝16 եւ Բերդի տարածքից՝ 8 համայնք) բացի Վ. Բաբաջանյանից թեկնածու են առաջադրված «Ինտերնեյշնլ մասիս տաբակ» ընկերության տնօրեն Մարինե Մարաբյանը եւ նույն ընկերության բանվորուհի Սուսանննա Աբրահամյանը: Տավուշի մարզային «Տավուշ» հեռուստաընկերությունը հրաժարվել է խորհրդարանական ընտրություններում գրանցված թեկնածուներին վճարովի եթեր տրամադրելուց:
Վարուժան Բաբաջանյանը մեր հարցին՝ եթե «Տավուշը» վճարովի եթեր չի տրամադրում, որտե՞ղ կարող է անցկացվել այդ հեռուստաբանավեճը, պատասխանեց, որ հեռուստաընկերությունը կարող է իր նախաձեռնությամբ անվճար կազմակերպել նման բանավեճ: Նշենք, որ դրա հավանականությունը շատ փոքր է:
Ոսկան ՍԱՐԳՍՅԱՆ
