«Հանրապետության նախագահը հստակ ֆիքսեց, որ ինքը դժգոհ է գնումների գործընթացից, եւ դա չի վերաբերում կառավարության ամբողջական գործունեությանը»,- այսօր ԱԺ-կառավարություն հարցուպատասխանին հաջորդած ճեպազրույցի ժամանակ հայտարարեց վարչապետ Տիգրան Սարգսյանը: «Կառավարությունը հավատարիմ է նախագահի որդեգրած սկզբունքին, բացթողումների եւ թերությունների մասին խոսելու ենք հրապարակային»,- հավելեց վարչապետը` պատասխանելով լրագրողների այն դիտարկումներին, որ ստացվում է, որ «ատկատների » մասին նախագահը ոչինչ չգիտեր, նոր իմացավ ու բարկացավ վարչապետի եւ կառավարության վրա, իրենք էլ սկսեցին զբաղվել այդ հարցերով: Վարչապետը նաեւ հավելեց. «Ձեր դիտարկումը կոռեկտ չէ, որովհետեւ սոցիալական բնագավառում մեր բացահայտումները տեղի են ունեցել երեք տարի առաջ: Բազմաթիվ այլ բնագավառներում եւս եղել են բացահայտումներ, որոնց արդյունքում պետբյուջեն տնտեսել է միլիարդավոր միջոցներ եւ դրանք հրապարակայնացվել են»:
Վարչապետի խոսքով, նախագահի քննադատությունը պետք է դիտարկել այս ենթատեքստում` հանրությունից ոչինչ չենք թաքցնելու: «Մենք հանրապետության նախագահի քննադատությունը դիտարկում ենք որ դա քարտ-բլանշ է, որը տրվել է կառավարությանը` գնումների գործընթացում կարգուկանոն հաստատելու համար եւ ավելի խիստ մոտեցումներ ենք դրսեւորելու, ինչը դուք տեսնում եք: Նախագահի քննադատությունը տեղին էր, այսօր մենք ունենք հնարավորություն օգտվելու այդ քարտ բլանշից եւ վճռական գործողություններ իրականացնելու»,-ասաց վարչապետը: Նրա խոսքով, կադրային բոլոր փոփոխությունները որ իրականացվում են նպատակ ունեն շտկելու վիճակը:
Նելլի ԳՐԻԳՈՐՅԱՆ
