«Կար ժամանակ, երբ դատախազությունն ուներ քննչական ապարատ և միաժամանակ և նախաքննություն էր իրականացնում, և հսկողություն նախաքննության օրինականության նկատմամբ, որը ակնհայտ է, որ չէր կարող չենթարկվել գերատեսչական շահերին։ Այդ էր պատճառը, որ նոր Սահմանադրությամբ և դրան հաջորդած իրավական բարեփոխումների արդյունքում քննչական ապարատն առանձնացվեց դատախազությունից, որպեսզի դատախազությունը հնարավորություն ունենա իրականացնելու անաչառ դատախազական հսկողություն։
Դատախազական անաչառ հսկողություն իրականացնելու համար դատախազությունը պետք է կաշկանդված չլինի նախաքննության արդյունքներով։Այն նպատակը, ինչի համար նախաքննությունը առանձնացվեց դատախազությունից, օրենքի վերը նշված նորմով անիրագործելի է դառնում։ Ակնհայտ է, որ դատախազությունը, նախաքննության մարմնի հետ միասին պատասխանատու լինելով դրա արդյունավետության համար, նրա հետ միասին պատասխան է տալիս նաև հանցագործության դեպքերի բացահայտման և նախաքննության ընթացքում թույլ տրված սխալների ու բացթողումների համար։ Այդ դեպքում դատախազությունը «շահագրգռված» է դառնում ոչ թե այդ սխալներն ու բացթողումները բացահայտելու, այլ դրանք կոծկելու, հանցագործության դեպքը բացահայտված ցույց տալու և գործը դատարանով ամեն կերպ «անց կացնելու» հարցում»,-«Առավոտի» հետ զրույցում ասաց «Հատկապես կարեւոր գործերով» փաստաբանական գրասենյակի ղեկավար, նախկին դատախազ Հակոբ Բաբայանը:
Հարցազրույցն ամբողջությամբ կարդացեք վաղվա «Առավոտ» օրաթերթում
