«Խորհուրդ կտամ Արամ Մանուկյանին նայել իրենց միտինգների ձայնագրությունները»,-այսօր Aravot.am-ի հետ զրույցում ասաց «Ժառանգություն» կուսակցության վարչության փոխնախագահ Արմեն Մարտիրոսյանը՝ «Մարտի 1-ի» հետ կապված Արամ Մանուկյանի վերջին հայտարարության առնչությամբ: Հիշեցնենք, որ ՀԱԿ խմբակցության քարտուղարը հարցին՝ ո՞վ է պատասխանատու «Մարտի 1-ի» համար, ասել էր՝ «Ռոբերտ Քոչարյանի խելահեղության արդյունքն էր դա: Էնտեղ քաղաքական ուժ աշխատում է՞ր, կներեք… ի՞նչ քաղաքական ուժ, լավ էլի»: Արմեն Մարտիրոսյանի խոսքերով՝ Ճիշտ կլինի իրենք իրենց միտինգների այն ձայնագրությունները նայեն, որտեղ հնչեցնում են «Մարտի 1-ի» պատասխանատուների անունները:
Մեր հարցին՝ համաձա՞յն եք այն դիտարկմանը, որ «Մարտի 1-ը» եղել է Ռոբերտ Քոչարյանի հրահանգով եւ հարց է՝ որեւէ քաղաքական ուժ մասնակցե՞լ է դրան, Արմեն Մարտիրոսյանը պատասխանեց. «Իրենք ամեն ինչ էլ կարող են ասել: Կարող են ասել, որ ԲՀԿ-ին ենք մեղավոր ճանաչում, բայց ոչ Գագիկ Ծառուկյանին: Կարող են ասել՝ այն ժամանակ սխալ կարծիք ենք ունեցել, սխալ տեղեկություն ենք ստացած եղել, հիմա այլ տեղեկություն ունենք՝ փոխվել է: Ամեն ինչ էլ իրենք կարող են ասել: Խնդիր չկա: Հին հայկական ասացվածք կա՝ լեզվի տակ ոսկոր չկա»:
Մեր հարցին՝ Ձեր դիրքորոշումը «Մարտի 1-ի» դերակատարների առնչությամբ չի՞ փոխվել՝ նա պատասխանեց. «Մենք ասել ենք այն, ինչ ասել ենք: Մեր դիրքորոշումը երբեւիցե չի փոխվի: Մենք ասել ենք եւ հիմա էլ կրկնում ենք, որ «Մարտի 1-ի» համար պատասխանատվություն կրում են օրվա իշխանությունները եւ հատկապես Ռոբերտ Քոչարյանը՝ որպես պետության գլուխ, որը իրավունք ուներ նմանատիպ հրամաններ տալու: Ուստիեւ այն դիրքորոշումները, որն ունեցել է «Ժառանգությունը» Մարտի 1-ի հետ կապված, նույն ձեւով մնում է, որեւէ փոփոխության չի ենթարկվում: Մի խնդիր էլ կա՝ «Ժառանգությունը» երբեւիցե չի պիտակավորել, ինչ-որ քաղաքական նպատակահարմարությունից պիտակներ չի դրել, որ հետագայում այդ պիտակներին փորձի հակադարձել՝ այլ դիրքորոշումներ հայտնելով: Ուստի ովքեր պիտակավորումներ արել են, թող նրանք էլ մտածեն ինչպես են հակառակ գործընթացներն անելու՝ այդ պիտակների շրջանակներում»:
Մենք ճշտեցինք՝ այսինքն՝ «Ժառանգոթյունը» ժամանակին ավելի զգուշավոր մոտեցումներ է ունեցել եւ պիտակներ չի՞ կպցրել, Արմեն Մարտիրոսյանը պատասխանեց. «Զգուշավոր չէ: Մենք ոչ թե պիտակավորում ենք, մենք գործն ենք նայում, արածն ենք նայում, մենք գործընթացն ենք վերլուծում եւ ոչ թե կոնկրետ անձնավորված պիտակավորում ենք տալիս: Առավել եւս՝ վիրավորանքներ»:
Կարդացեք նաև
Հռիփսիմե ՋԵԲԵՋՅԱՆ
