«Մոսկվայում ընկալում կա առ այն, որ Հայաստանի բնակչության բավական մեծ հատված երկմտում է Հայաստանի գերակայությունների այս շարժի վերաբերյալ։ Ուստի, հանրաքվեն ցույց կտա, որ Հայաստանի հասարակությունն առնվազն միասնական չէ Եվրամիության անդամակցության ձգտման մեջ»,- «Ուրվագծելով փոփոխության ճարտարապետությունը» խորագրով ԱՊՐԻ ֆորումի ժամանակ ասաց Միջազգային հարցերով ռուսաստանյան խորհրդի նախկին գլխավոր տնօրեն և գիտական ղեկավար Անդրեյ Կորտունովը՝ անդրադառնալով հարցին, թե ինչո՞ւ են ՌԴ իշխանությունները պահանջում, որպեսզի ԵՄ անդամակցության հարցով հանրաքվե անցկացվի Հայաստանում։
Անդրեյ Կորտունովը հավելեց․ «Չեմ կարծում, թե Մոսկվայում պատրանքներ ունեն առ այն, թե Հայաստանի կառավարությունը նման հանրաքվե կանցկացնի։ Բայց դա այն դիրքորոշումն է, որն արտացոլում է ռուսական տարակարծությունները Հայաստանի հասարակության միասնականության վերաբերյալ»։
Անդրադառնալով տարածաշրջանում Ռուսաստանի դերին՝ ասաց, որ ՌԴ դիրքերն այդքան էլ ուժեղ չեն, Ուկրաինայի դեմ «հատուկ ռազմական գործողությունը» ստվեր է գցել Ռուսաստանի դիրքերի վրա հետխորհրդային տարածքում, այդ թվում՝ Հարավային Կովկասում։ Ավելի դժվար է դարձել պահպանել ազդեցության եւ ներգրավման նախկին մակարդակը։
«Ինչ-որ իմաստով շատ բան կախված կլինի նրանից, թե ռուս-ուկրաինական հակամարտությունն ինչպես կլուծվի, ինչ տեղի կունենա այդ հանգուցալուծումից հետո։ Ըստ իս՝ որոշ հարցերի շուրջ Ռուսաստանն ու Թուրքիան կարող են համագործակցել եւ նույնիսկ համակարգել իրենց գործառույթները»,- հավելեց ռուս գործիչը։
Կարդացեք նաև
Ռոզա ՀՈՎՀԱՆՆԻՍՅԱՆ
