Ողջ քաղաքական դաշտը, ինչպես նշեց ԲՀ Կ խմբակցության քատուղար Նաիրա Զոհրաբյանը, շունչները պահած սպասում է ԲՀԿ-ի որոշմանը:
Aravot.am-ը «Պոլիտէկոնոմիա» ինստիտուտի տնօրեն Անդրանիկ Թեւանյանից հետաքրքրվեց՝ Ձեր կանխատեսմամբ՝ ի՞նչ կորոշի ԲՀԿ-ն: Նա պատասխանեց. «Նաիրա Զոհրաբյանն արդեն հայտարարել է, որ ինքը սկսում է խորհրդակցությունների շարքը քաղաքական հասարակական շահագրգիռ շրջանակների հետ եւ կողմ է, որպեսզի տեղի ունենա կառավարական համակարգի փոփոխություն եւ անցում՝ խորհրդարանական համակարգի: Կարծում եմ, դա դրական քայլ է այն առումով, որ խնդիր է դրվում ոչ թե մեզանում ավանդական դարձած անձերի շուրջ միավորումը, այլ՝ գաղափարների շուրջ միավորումը: Ողջունելի կլինի, եթե ընդդիմադիր դաշտի շահագրգիռ ուժերը ի վերջո հասնեն «կոնսենսուս մինուս Սերժ Սարգսյան» բանաձեւի կոչմանը: Պարտադիր չէ, որ լինի մեկ միասնական թեկնածու, բայց կարեւոր է, որպեսզի ստեղծվի փաստացի մեկ միասնական ճակատ, եւ Սերժ Սարգսյանը մնա մենակ: Նա հիմա էլ դե ֆակտո այդպիսի վիճակում է, որովհետեւ ՕԵԿ-ն է միայն պաշտոնապես սատարում Սերժ Սարգսյանին եւ ՀՀԿ-ն: Բայց ես տեսնում եմ, որ նույն ՀՀԿ-ի ներսում էլ տարբեր թեւեր կան, ովքեր դեմ են, որ Հայաստանում ստեղծվի թուքմենբաշիական, բոլշեւիկյան համակարգ, որպեսզի ստեղծվի անվերահսկելի իշխանություն, որպեսզի Հայաստանում իրականացվի սեփականության վերաբաշխման միջոցով գերկենտրոնացված տնտեսական համակարգի կառուցում»:
Մենք ճշտեցինք՝ այսինքն՝ ՀՀԿ-ի ներսում է՞լ կան Սերժ Սարգսյանի թշնամիներ՝ Անդրանիկ Թեւանյանը պատասխանեց. «Ոչ թե թշնամիներ, այլն այդ մարդիկ դեմ են այն մոդելին, որը պատկերացնում է Սերժ Սարգսյանը: Սերժ Սարգսյանը պատկերացնում է միանձնյա որոշումների մոդել: Բայց դա դեպի ոչ մի տեղ տանող ճանապարհ է, եւ մենք դա տեսանք ե՛ւ ֆուտբոլային դիվանագիտության ժամանակ, ե՛ւ տնտեսական քաղաքականության ժամանակ: Այս իրավիճակի պատասխանատուն Բաղրամյան 26-ն է, եւ, բնականաբար, այդ պատասխանատվությունը որեւէ ձեւով պետք է արտահայտվի: Իսկ դա նախագահական ընտրությունների ժամանակ փոփոխության գնալն է: Եթե ստեղծվի լայն կոնսոդիլացիա հասարակական եւ քաղաքական, ապա այդ փոփոխությունը կլինի առանց ցնցումների, իսկ եթե իշխանությունը փորձի դիմադրել, ապա անցանկալի հետեւանքներ կարող են լինել: Հետեւաբար, անցանկալի զարգացումներից խուսափելու համար պետք է այնպիսի մթնոլորտ ձեւավորել երկրում, որ Սերժ Սարգսյանը հասկանա, որ եթե ուժի կիրառման հրաման տա, ապա այդ հրամանը չի կատարվելու: Զինվորները, որոնք պետք է կատարեն հրամանը, նույնպես մեր երկրի քաղաքացիներ են, եւ իրենք էլ են տեսնում, որ այսպես երկար շարունակվել չի կարող: Այս քաղաքականությունը, որը ղեկավարում է Սերժ Սարգսյանը, տանում է Հայաստանի թուլացմանը, Ադրբեջանի եւ Հայաստանի միջեւ հավասարակշռության խախտմանը եւ պատերազմի վերսկսման հավանականության մեծացմանը»:
Հռիփսիմե ՋԵԲԵՋՅԱՆ
Կարդացեք նաև
