«Ամերիկայի Ձայն». Ռուսաստանի նախագահը վերահաստատել է իր դիրքորոշումն այն մասին, որ Սնոուդենը կարող է մնալ Ռուսաստանում միայն այն դեպքում, եթե դադարեցնի ԱՄՆ-ին վնաս հասցնող տեղեկությունների արտահոսքը
Ռուսաստանի նախագահ Վլադիմիր Պուտինն ասել է, թե ԱՄՆ-ի հետ Մոսկվայի հարաբերություններն ավելի կարևոր են, քան փախուստի մեջ գտնվող, Միացյալ Նահանգների հետախուզական ծառայությունների պայմանագրային նախկին աշխատող Էդվարդ Սնոուդենի շուրջ ծավալված վեճը:
Պուտինը չի ասել, թե արդյոք Ռուսաստանն ապաստան կտրամադրի Սնոուդենին, սակայն նշել է, որ «երկկողմանի հարաբերությունները շատ ավելի կարևոր են, քան անվտանգության ծառայությունների աշխատանքի շուրջ ընթացող վեճերը»:
Ռուսաստանի նախագահը վերահաստատել է նաև իր դիրքորոշումն այն մասին, որ Սնոուդենը կարող է մնալ Ռուսաստանում միայն այն դեպքում, եթե նա դադարեցնի Միացյալ Նահանգներին վնաս հասցնող տեղեկությունների արտահոսքը:
Կարդացեք նաև
ԱՄՆ-ի Սպիտակ տան խոսնակ Ջեյ Քարնին իր հերթին նշել է, որ Միացյալ Նահանգները Մոսկվային կարող է ներկայացնել իրավական բավարար հիմքեր՝ Սնոուդենին վերադարձնելու և վերջինիս «քրեական լուրջ հանցագործություններ» իրականացնելու մեջ մեղադրանքներ ներկայացնելու համար:
ԱՄՆ-ի հետախուզական ծառայությունների պայմանագրային նախկին աշխատող, 30-ամյա Էդվարդ Սնոուդենը նախօրեին իրեն ժամանակավոր ապաստան տրամադրելու մասին դիմում է ներկայացրել երեքշաբթի օրը Ռուսաստանի միգրացիայի դաշնային ծառայություն՝ չնայած այն հանգամանքի, որ ինքն ի վերջո, նախատեսում է տեղափոխվել Լատինական Ամերիկա:
Սնոուդենը, որը փորձում է խուսափել գաղտնի տեղեկությունների արտահոսք կատարելու պատճառով Միացյալ Նահանգներում լրտեսության մեղադրանքներով դատարանի առջև կանգնելուց, արդեն չորս շաբաթ գտնվում է Մոսկվայի «Շերեմետևո» օդանավակայանի տարանցման գոտում:
Լատինական Ամերիկայի ձախամետ երեք պետություն՝ Վերեսուելան, Բոլիվիան և Նիկարագուան, քաղաքական ապաստան են առաջարկել Սնոուդենին, որը սակայն չի կարողանում լքել «Շերեմետևո»-ի տարանցման գոտին, քանի որ Միացյալ Նահանգները չեղյալ է հայտարարել նրա անձնագիրը:
Արմեն Հովհաննիսյան
