Այսօր ՀՀԿ ԳՄ նիստում չեն շրջանցել նաեւ ՌԴ նախագահ Վլադիմիր Պուտինի՝ Հայաստան կատարելիք այցը եւ այդ կապակցությամբ նախատեսված բողոքի ակցիաները:
«Կուսակցությունը գտնում է, որ Ռուսաստանը Հայաստանի թիվ մեկ ռազմավարական դաշնակիցն է, եւ մենք, որպես Հայաստանի հանրապետության իշխող քաղաքական ուժ շահագրգռված ենք եւ ամեն ինչ անելու ենք, որ հայ-ռուսական դաշնակցային հարաբերությունները զարգանան՝ թե հումանիտար, թե քաղաքական, թե տնտեսական, թե մշակութային, թե ռազմական ոլորտներում եւ կարծում եմ, որ այդ երեւույթը երկուստեք է»,- նիստի ավարտից հետո լրագրողներին ասաց Էդուարդ Շարմազանովը:
Ըստ նրա, Հայաստանն ունի բազմաթիվ գործընկերներ, բարեկամներ, բայց. «Մեր ռազմավարական գործընկերը Ռուսաստանի Դաշնությունն է, եւ մենք պետք է շարունակենք դաշնակցային հարաբերութունների զարգացումը, որը ՌԴ նախագահի այցից հետո կարծում եմ՝ էլ ավելի բարձր մակարդակի վրա կդրվի»:
Պարոն Շարմազանովը, անդրադառնալով պարտադիր կուտակային կենսաթոշակային համակարգի ներդրման շուրջ բարձրացված աղմուկին եւ բողոքի ցույցերին, ասաց, թե ցույցերին եւ թե օրինական բողոքներին դրական է վերբերում, որովհետեւ Հայաստանը ժողովրդավար երկիր է. « Իսկ պարտադիր կուտակային կենսաթոշակների օրենքը քննարկվել է տարիներ շարունակ բոլոր քաղաքական ուժերի հետ, եւ փոստը այն է, որ ընդունվել է օրենքը ու պետք է մտնի կիրառության մեջ: Շատերը ասում են, որ հասարակության մի հատվածը եւ ընդդիմությունը դեմ է: Կա իշխող կոալիցիա, որը պառլամենտական ընտրությունների ժամանակ ստացել է Հայաստանի բնակչության մեծամասնության քվեն: Դա նշանակում է՝ վստահության մանդատ եւ այն, որ իմ հասարակության մեծամասնությունը ինձ պատվիրում է իրականացնել իմ կառավարության քաղաքականությունը առաջիկա հինգ տարիների ընթացքում: Ընդդիմության կարծիքը հարգում եմ, բայց կարծում եմ, որ պետք է սպասեն 2017 թվականին»:
Կարդացեք նաև
Արփինե ՍԻՄՈՆՅԱՆ
